गलेश्वर (म्याग्दी)। कालीगण्डकी र म्याग्दी नदीको सङ्गमस्थलमा अवस्थित म्याग्दीको सदरमुकाम बेनीबजार चक्रपथ (रिङरोड) स्तरोन्नति पूरा भएपछि सुरक्षित र सुन्दर देखिएको छ। नदी कटानबाट बजारलाई जोगाउन निर्माण गरिएको तटबन्धमाथि 'आरसिसी' ढलान गरी चक्रपथ बनाइएको हो।
नेपाल सरकारको देशभर १० वटा नमुना नगरपालिका बनाउने कार्यक्रमअन्तर्गत रु तीन करोड १९ लाखको लगानीमा बेनीबजारस्थित चक्रपथ स्तरोन्नतिको काम सम्पन्न भएको बेनी नगरपालिकाका प्रमुख सुरत केसीले जानकारी दिए।
बेनी नगरपालिका–८, कालीपुलदेखि दोभान हुँदै खुलामञ्चको पश्चिमतर्फ बहुउद्देश्यीय मैदान छेउसम्म करिब ९०० मिटर लम्बाइ र पाँचदेखि छ मिटर चौडाइको सडकमा नालीसमेत निर्माण गरिएको छ।
यसरी बेनीबजारको बाहिरी क्षेत्रमा कालीगण्डकी र म्याग्दी नदीको किनारैकिनार चक्रपथ बनेपछि सवारीसाधन आवागमनमा सहज भएको छ। यसले बजार क्षेत्रको भित्री भागमा सवारीसाधनको चाप घटाएर दुर्घटनाको जोखिम पनि कम गरेको नगरप्रमुख केसीले स्पष्ट पारे।
बाढीको उच्च जोखिमयुक्त जिल्ला सदरमुकाम बेनीबजार संरक्षणका लागि 'आरसिसी' तथा 'मेसिनरी' तटबन्ध निर्माणको कामले निरन्तरता पाइरहेको छ। विसं २०७३ मा कालीगण्डकी नदी किनारमा पक्की र म्याग्दी नदी किनारमा मेसिनरी पर्खाल लगाउने गरी जल उत्पन्न प्रकोप नियन्त्रण सव–डिभिजन कार्यालय बागलुङले बेनी बजार संरक्षण आयोजना सुरु गरेको थियो। विसं २०७२ मा कालीगण्डकी किनारमा रु एक करोड ८८ लाखको लागतमा १२४.५ मिटर र २०७० सालमा ६३ मिटर पक्की पर्खाल निर्माण गरिएको थियो। यसैबीच सिँचाइ मन्त्रालयले बेनीबजार संरक्षण कार्यक्रमको विस्तृत आयोजना प्रतिवेदन (डीपीआर) समेत स्वीकृत गरेको थियो।
कालीगण्डकी र म्याग्दीको सङ्गमस्थलमा रहेको बेनीबजार १७औँ शताब्दीमा बस्ती विस्तार भएको एक ऐतिहासिक एवं रमणीय बस्ती हो। इतिहासकार चन्द्रप्रकाश बानियाँका अनुसार, १६३१ सालमा पर्वत राज्यको विखण्डन भएपछि पर्वतका सातौँ राजा मलेबम मल्लले पर्वत राज्यको राजधानी बेनीमा सारेपछि व्यावसायिक यात्राको सुरुआत र बस्ती विस्तार भएको थियो।
अन्नपूर्ण सर्किटअन्तर्गत प्रमुख पर्यटकीय आकर्षण र बासस्थान बनेको बेनीबजार राजधानी काठमाडौँदेखि करिब ३०० किलोमिटर पश्चिममा अवस्थित छ। सदरमुकाम बेनी र आसपासका क्षेत्रबाट अन्नपूर्ण, धौलागिरि, नीलगिरि, चुरैन, मानापाथी र गुर्जासहित एक दर्जनभन्दा बढी हिमशृङ्खलाहरू देख्न सकिन्छ।
