युद्धको पाँचौँ वर्षका लागि ईयूको तयारी: ९० अर्ब युरोले भरथेग गरिनेछ युक्रेनको सैन्य र प्रशासनिक बजेट
हाम्रा कुरा
प्रकाशित २०८२ माघ १ बिहिबार
2.1k
Shares
काठमाडौँ। युरोपेली सङ्घले युक्रेनका लागि ९० अर्ब युरो अर्थात् १०५ अर्ब डलर बराबरको महत्त्वपूर्ण ऋण प्याकेज घोषणा गरेको छ, जसको दुई तिहाइ हिस्सा सैन्य सुदृढीकरणमा र बाँकी रकम सामान्य प्रशासनिक बजेटका लागि खर्च गरिने ब्रसेल्सले बुधबार जानकारी दिएको छ।
महिनौँको कूटनीतिक रस्साकस्सीपछि डिसेम्बरमा ईयू सदस्य राष्ट्रहरूले युक्रेनको सैन्य संयन्त्रका लागि यो सहयोग उपलब्ध गराउन सहमति जनाएका हुन्, जसले रुसी आक्रमणको पाँचौँ वर्षमा प्रवेश गर्न लागेको युक्रेनलाई नगद अभावका बीच ठूलो राहत दिनेछ। ईयू प्रमुख उर्सुला भोन डेर लेयनले यो सहयोगले युक्रेनलाई युद्धको मैदानमा प्रतिरक्षा बलियो बनाउन मात्र नभई राज्यका आधारभूत सेवाहरू सुचारु राख्न समेत मद्दत गर्ने विश्वास व्यक्त गर्नुभएको छ।
यो कोष मुख्यतया युक्रेन र युरोपेली देशहरूबाटै हतियार खरिद गर्न प्रयोग गरिने रणनीति बनाइएको छ, जसले फ्रान्स जस्ता मुलुकहरूको चाहनाअनुसार युरोपको आफ्नै रक्षा उद्योगलाई बलियो बनाउन र संयुक्त राज्य अमेरिकामाथिको परम्परागत निर्भरता कम गर्न सहयोग पुर्याउनेछ।
यद्यपि, यदि आवश्यक सैन्य उपकरणहरू युरोपभित्र सहजै उपलब्ध नभएमा युक्रेनले कहिलेकाहीँ युरोप बाहिरबाट पनि खरिद गर्न सक्ने लचकता प्रदान गरिएको छ। भोन डेर लेयनले यो लगानीबाट युरोपभित्रै रोजगारी सिर्जना हुने, अनुसन्धान र विकासमा प्रगति हुने र लगानीको प्रतिफल प्राप्त हुने कुरामा जोड दिनुभएको छ।
आगामी दुई वर्षका लागि युक्रेनको वित्तीय आवश्यकताको ठूलो हिस्सा पूरा गर्ने यो ऋण प्रक्रिया अघि बढ्नका लागि अब युरोपेली संसद् र सदस्य राष्ट्रहरूको औपचारिक अनुमोदन आवश्यक हुनेछ। रुसी केन्द्रीय बैंकको रोक्का गरिएको सम्पत्ति प्रयोग गर्ने योजना विफल भएपछि ईयूका नेताहरूले साझा बजेटमार्फत यो ऋणको ग्यारेन्टी दिने सम्झौता गरेका थिए। यस ऋणको वार्षिक करिब तीन अर्ब युरो ब्याजको भार ब्रसेल्सले ईयूकै बजेटमार्फत बेहोर्ने निर्णय समेत गरेको छ।
