काठमाडौँ । रुसको राजधानी मस्को र यसको वरपरको क्षेत्रमा आइतबार बिहान भएको ठूलो मात्राको ड्रोन (मानवरहित हवाई यान) आक्रमणमा परी कम्तीमा तीन जनाको मृत्यु भएको छ। क्षेत्रीय गभर्नर आन्द्रेई भोरोब्योभले घटनाको पुष्टि गर्दै आक्रमणबाट ठूलो भौतिक क्षतिसमेत भएको जानकारी दिएका छन्।

गभर्नर भोरोब्योभका अनुसार, एउटा आवासीय घरमा ड्रोन ठोक्किँदा एक महिलाको ज्यान गएको हो। उद्धारका क्रममा थप दुई पुरुषको पनि शव फेला परेसँगै मृतकको सङ्ख्या तीन पुगेको हो भने अझै एक व्यक्ति भग्नावशेषमुनि फसेको आशङ्का गरिएको छ।

आइतबार बिहान करिब ३ बजेदेखि नै रुसी वायु रक्षा प्रणालीले आकाशमै यी ड्रोनहरूलाई रोक्ने र खसाल्ने प्रयास गरिरहेको उनले बताए। यस क्षेत्रमा कम्तीमा चार जना घाइते भएका छन् भने विभिन्न पूर्वाधार संरचनाहरूमा पनि क्षति पुगेको छ।

राजधानी मस्कोका मेयर सर्गेई सोब्यानिनका अनुसार रातभरको अवधिमा मस्कोको आकाशमा मात्रै कम्तीमा ७४ वटा मानवरहित हवाई यान (ड्रोन) लाई खसालिएको वा इलेक्ट्रोनिक माध्यमबाट अवरुद्ध गरिएको थियो। आकाशमै ड्रोनहरू नष्ट गरिए पनि त्यसको भग्नावशेष भुइँमा खस्दा १२ जना सर्वसाधारण घाइते भएका छन्।

भग्नावशेषका कारण केही स्थानका भवनहरूमा सामान्य क्षति पुगेको छ। रुसी रक्षा मन्त्रालय सम्बद्ध स्रोतहरूले पछिल्लो २४ घण्टामा देशका विभिन्न हिस्सामा गरी कुल १२० वटा मानवरहित हवाई यान नष्ट गरिएको दाबी गरेका छन्।

यस भीषण आक्रमणको जिम्मेवारीबारे हालसम्म कुनै पनि पक्षबाट आधिकारिक पुष्टि भइसकेको छैन। यद्यपि, पछिल्लो समय युक्रेनले रुसका भित्री सहरहरू र सैन्य तथा औद्योगिक पूर्वाधारहरूलाई लक्षित गरी ड्रोन आक्रमण तीव्र पार्दै आएको छ। युक्रेनले यस्ता कदमहरूलाई रुसी आक्रमणको विरुद्ध ‘प्रतिशोधात्मक कारबाही’ भन्ने गरेको छ।

युक्रेनी राष्ट्रपति भोलोदिमिर जेलेन्स्कीले हालैका दिनहरूमा रुसभित्र थप प्रतिकारात्मक र शक्तिशाली आक्रमणहरू गर्ने चेतावनी दिएका थिए । जसका कारण यो आक्रमण पनि त्यसैको कडी हुन सक्ने अन्तर्राष्ट्रिय सञ्चारमाध्यमहरूले अनुमान गरेका छन्। मस्कोमा सुरक्षा सतर्कता निकै कडा पारिएको छ।