युक्रेन युद्धविरामका लागि रुसमाथि थप दबाब दिन बेलायत र फ्रान्सको आह्वान
हाम्रा कुरा
प्रकाशित २०८२ असार २७ शुक्रबार
1.4k
Shares
काठमाडौँ। बेलायतका प्रधानमन्त्री केइर स्टार्मर र फ्रान्सका राष्ट्रपति इमानुएल म्याक्रोँले युक्रेनमा युद्धविरामका लागि रुसमाथि थप दबाब सिर्जना गर्न विश्व समुदायलाई आह्वान गरेका छन्। बेलायतबाट तथाकथित ’इच्छुक गठबन्धन’ को भिडियो कन्फरेन्स बैठकको सह-अध्यक्षता गर्दै दुवै नेताले युक्रेनका लागि युद्धविरामपछिको शान्ति सेनाको योजना तयार रहेको पनि बताएका छन्।
प्रधानमन्त्री स्टार्मरले भने, "हामीले शान्तिको तयारीका लागि आफ्नो कामलाई परिवर्तन गर्नु पर्छ, पुटिनलाई वार्ताको टेबलमा बस्न दबाब दिएर यो सम्भव बनाउनुपर्छ। यो समन्वित दबाबले फरक पार्नेछ।"
राष्ट्रपति म्याक्रोँले मित्र राष्ट्रहरूलाई "रुसमाथि दबाब बढाउन" आह्वान गर्दै भने, "रुसमाथि दबाब बढाउनका लागि हामीलाई स्पष्ट रूपमा केही नयाँ उपाय आवश्यक भएको छ।" उनले रुसी अर्थतन्त्रमा रहेको दबाबलाई परिमार्जन गर्न सक्ने नयाँ उपायको खाँचो देखिएको पनि बताए।
यी दुई नेताले नेटोले कमाण्ड सेन्टरको रूपमा प्रयोग गर्दै आएको उत्तर पश्चिम लन्डनको नर्थवुडमा रहेको बेलायती सैन्य अखडाबाट उक्त धारणा सार्वजनिक गरेका हुन्।
बैठकमा इटालीका प्रधानमन्त्री जियोर्जिया मेलोनी, युक्रेनका राष्ट्रपति भोलोदिमिर जेलेन्स्की, अमेरिकी सिनेटर लिन्डसे ग्राहम र रिचार्ड ब्लुमेन्थल ले रोमबाट सहभागिता जनाएका थिए।
आफ्नो टिप्पणीमा जेलेन्स्कीले मस्कोमाथि नयाँ प्रतिबन्ध आवश्यक रहेको बताए। उनले भने, "यो सबै साझेदारहरूलाई स्पष्ट छ कि रुसले सबै शान्ति प्रयासहरू अवरुद्ध गरिरहेको छ।"
योजनाबद्ध शान्ति सेनाबारे छलफल गर्दै म्याक्रोँले भने, "हामीसँग युद्धविरामको केही घण्टापछि जान र सुरु गर्ने गरी एउटा योजना तयारी अवस्थामा छ।" स्टार्मरले पनि यी योजनाहरू परिपक्व रहेको र दीर्घकालीन स्तरमा राखिएको बताए।
