विश्वकपमा लुकाकुले बनाए बेल्जियमका लागि नयाँ कीर्तिमान
हाम्रा कुरा
प्रकाशित २०८३ असार १३ शनिबार
430
Shares
काठमाडौँ । बेल्जियमका अनुभवी फरवार्ड रोमेलु लुकाकु फिफा विश्वकप इतिहासमा बेल्जियमका तर्फबाट सर्वाधिक गोल गर्ने खेलाडी बनेका छन्। क्यानडाको भ्यानकुभरमा शनिबार सम्पन्न फिफा विश्वकप २०२६ अन्तर्गत समूह ‘जी’ को खेलमा बेल्जियमले न्युजिल्यान्डलाई ५–१ को भारी गोल अन्तरले पराजित गर्ने क्रममा लुकाकुले यो ऐतिहासिक सफलता हात पारेका हुन्।
३३ वर्षीय लुकाकुले खेलको ८६औं मिनेटमा गोल गर्दै आफ्नो विश्वकप करियरको छैटौं गोल पूरा गरे। यससँगै उनले बेल्जियमका लागि विश्वकपमा ५ गोल गरेका मार्क विल्मोट्सको कीर्तिमान तोड्दै देशका लागि विश्वकप इतिहासमै सबैभन्दा धेरै गोल गर्ने खेलाडीको रूपमा नयाँ कीर्तिमान कायम गरे।
न्युजिल्यान्डविरुद्धको खेलमा बेल्जियमलाई जिताउन लियोनार्द ट्रोसार्डले दुई गोलको योगदान दिए। खेलको २८औं मिनेटमा गोल गर्दै टोलीलाई सुरुवाती अग्रता दिलाएका ट्रोसार्डले दोस्रो हाफको सुरुआतमै अर्को आकर्षक गोल थप्दै व्यक्तिगत दोस्रो गोल पूरा गरेका थिए। त्यसपछि कप्तान केभिन डि ब्रयुनले पेनाल्टी बक्स बाहिरबाट उत्कृष्ट प्रहार गर्दै बेल्जियमको अग्रतालाई ३–० को स्थितिमा पुर्याए।
खेलको बीचमा न्युजिल्यान्डका लागि एलिजले एक गोल फर्काए पनि त्यसपछि लुकाकुले हेडमार्फत गोल गर्दै टोलीको अग्रता अझ फराकिलो बनाएका थिए। खेलको अन्तिम क्षणमा लुकाकुकै पासमा एलेक्ससीसले गोल गरेपछि बेल्जियमको ५–१ को शानदार जित सुनिश्चित भयो।
यस जितसँगै बेल्जियम समूह ‘जी’ को शीर्ष स्थानमा रहँदै फिफा विश्वकप २०२६ को नकआउट चरण (राउन्ड अफ १६) मा प्रवेश गर्न सफल भएको छ।
