काठमाडौँ। रूसी राष्ट्रपति भ्लादिमिर पुटिनले बिहीबार युक्रेनले रूसले दाबी गरेको भूमि छोड्न तयार नभए युद्ध जारी रहने र ती क्षेत्रहरू सैन्य माध्यमबाट कब्जा गरिने बताएका छन्।

किर्गिस्तानको भ्रमणका क्रममा पुटिनले भने, “यदि युक्रेनी सेनाले आफ्नो कब्जामा रहेको क्षेत्र छोडे भने हामी युद्ध अभियान रोक्नेछौँ। यदि उनीहरूले त्यसो गरेनन् भने, हामी यसलाई सैन्य माध्यमबाट प्राप्त गर्नेछौँ।”

रूसी सेना पूर्वी युक्रेनमा महँगो लडाईमा फसेको बेला, वाशिङ्गटनले युद्ध अन्त्य गर्न आफ्नो प्रयास नवीकरण गरेको र एउटा आश्चर्यजनक योजना अघि सारेको छ। पुटिनले संशोधित नयाँ योजनाको अध्ययन गरेका छन् र यो वार्ताको सुरुवात हुन सक्ने बताएका छन्। उनले पछिल्लो मस्यौदाबारे "समग्रमा, हामी सहमत छौँ। यो भविष्यका सम्झौताहरूको आधार बन्न सक्छ," भनेका छन्। यो प्रस्तावलाई अमेरिकाले लगभग २० बुँदामा छोट्याएको अनुमान छ।

युक्रेनका युरोपेली सहयोगीहरूलाई सामेल नगरी तयार गरिएको अमेरिकाको मूल योजनामा डोनेट्स्क, क्रिमिया र लुगान्स्कलाई रूसी भूगोलका रूपमा मान्यता दिने उल्लेख भएपछि आलोचनाका कारण फिर्ता गरिएको थियो। पुटिनले अमेरिकी वार्ताकार स्टिभ विटकोफ अर्को हप्ता मस्को भ्रमण गर्ने अपेक्षा गरिएको बताएका छन्। यता, युक्रेनका शीर्ष राष्ट्रपतिका सहयोगी एन्ड्री येरमाकले अमेरिकी रक्षामन्त्री डान ड्रिस्कोल यसै साताको अन्त्यमा किएभको भ्रमण गर्ने बताएका छन्।

युद्धभूमिको सन्दर्भमा, पुटिनले रुसले युक्रेनको पूर्वी डोनेत्स्क क्षेत्रको पोक्रोभ्स्क र मर्नोग्राडमा युक्रेनी सेनालाई घेरेको दाबी दोहोऱ्याएका छन्, यद्यपि युक्रेनले उक्त क्षेत्रहरू घेरिएको अस्वीकार गरेको छ। युक्रेनको पाँच भागको एक भाग रुसले नियन्त्रण गरेको छ, र किएभले कब्जा गरिएको भूमिलाई कहिल्यै नछोड्ने बताएकाले यो मुद्दा शान्ति प्रक्रियाको सबैभन्दा ठूलो अवरोध रहेको छ। अन्तमा, पुटिनले युक्रेनी राष्ट्रपति भोलोदिमिर जेलेन्स्कीको वैधतामाथि पनि प्रश्न उठाएका छन् र उनीसँग कुनै पनि सम्झौतामा हस्ताक्षर गर्नु कानुनी रूपमा ‘लगभग असम्भव’ हुने बताएका छन्।