साताको पहिलो दिन नेप्सेमा १० अङ्कको गिरावट, पाँच अर्ब माथिको कारोबार
हाम्रा कुरा
प्रकाशित २०८२ पुष २० आइतबार
730
Shares
काठमाडौँ। साताको पहिलो कारोबार दिन आइतबार नेपाल स्टक एक्सचेञ्ज (नेप्से) परिसूचकमा दोहोरो अङ्कको गिरावट देखिएको छ । आज नेप्से परिसूचक १० दशमलव २९ अङ्कले घटेर दुई हजार ६१० दशमलव ६३ को बिन्दुमा कायम भएको छ । बजार ओरालो लागे पनि कारोबार रकममा भने उत्साहजनक सुधार देखिएको छ ।
नेप्सेका अनुसार आज ३२३ कम्पनीका एक करोड दुई लाख ७४ हजार १२६ कित्ता शेयर ७९ हजार ७०२ पटक खरिदबिक्री हुँदा कूल ५ अर्ब एक करोड ७५ लाख ८७ हजार २९४ रुपैयाँ बराबरको कारोबार भएको छ ।
आजको बजारमा मिश्रित प्रभाव देखिएको छ जहाँ १३ उपसमूहमध्ये तीनवटामा सुधार आएको छ भने बाँकी १० वटा समूह घटेका छन् । होटल तथा पर्यटन समूह शून्य दशमलव ६२, उत्पादन तथा प्रशोधन एक दशमलव ०४ र व्यापार समूह शून्य दशमलव ३४ प्रतिशतले बढेका छन् । अर्कोतर्फ बैंकिङ, विकास बैंक, वित्त, जलविद्युत्, लगानी, जीवन बीमा, लघुवित्त, म्युचुअल फन्ड र निर्जीवन बीमा समूहको सूचकमा गिरावट आएको छ । सबैभन्दा धेरै गिरावट अन्य समूहमा एक दशमलव ६९ प्रतिशतको देखिएको छ ।
आजको कारोबारमा विन नेपाल लघुवित्त वित्तीय संस्था लिमिटेड र श्रीनगर एग्रीटेक इन्डस्ट्रिज लिमिटेडको शेयर मूल्यमा सकारात्मक सर्किट लागेको छ । शेयर मूल्य सर्वाधिक घट्नेमा भने न्यादी हाइड्रोपावर लिमिटेड अगाडि रहेको छ जसको मूल्य चार दशमलव ३२ प्रतिशतले ओरालो लागेको छ । कारोबार रकमका आधारमा आज एसवाई प्यानल नेपाल लिमिटेडले वर्चस्व जमाउँदै ३० करोड ६५ लाख ८५ हजार रुपैयाँभन्दा बढीको कारोबार गरेको छ । त्यस्तै शेयर किनबेच भएको सङ्ख्याका आधारमा एनआईसी एसिया बैंक लिमिटेड सबैभन्दा अगाडि देखिएको छ जसको छ लाख ३४ हजार ७४९ कित्ता शेयर कारोबार भएको छ ।
