साताको अन्तिम दिन सेयर बजारमा उत्साह: नेप्से २७ अङ्कले बढ्दा सबै उपसूचक हरिया
हाम्रा कुरा
प्रकाशित २०८३ वैशाख २५ शुक्रबार
352
Shares
काठमाडौँ । नेपाल स्टक एक्सचेञ्ज (नेप्से) परिसूचक यो साता कारोबारको अन्तिम दिन २७.४९ अङ्कले बढेर २,७४५.६५ बिन्दुमा कायम भएको छ। यो अघिल्लो कारोबारको तुलनामा १.०१ प्रतिशतको वृद्धि हो। नेप्सेका अनुसार आज ३३५ कम्पनीका ७४ लाख ७८ हजार ५६२ कित्ता सेयर ५३ हजार १४ पटक खरिदबिक्री हुँदा कुल रु ३ अर्ब २८ करोड ६८ लाख ७० हजार ५५९ बराबरको कारोबार भएको छ।
आजको कारोबारमा बजारका सबै समूहका उपसूचकहरूमा वृद्धि देखिएको छ। वित्त समूह १.८७ प्रतिशत, जलविद्युत् १.७१ प्रतिशत, निर्जीवन बीमा १.५२ प्रतिशत र होटल तथा पर्यटन समूह १.४८ प्रतिशतले बढेका छन्। यस्तै उत्पादन तथा प्रशोधन समूह १.४० प्रतिशत, अन्य समूह १.१३ प्रतिशत, लगानी समूह १.१० प्रतिशत र विकास बैंक समूहमा ०.९५ प्रतिशतको सुधार आएको छ। बैंकिङ, जीवन बीमा, लघुवित्त र म्युचुअल फन्ड समूहका उपसूचकहरूमा पनि सामान्य वृद्धि भएको नेप्सेले जनाएको छ।
आज त्रिशूली जलविद्युत् कम्पनी लिमिटेडको सेयर मूल्य १० प्रतिशतले बढ्दै सर्वाधिक कमाउने कम्पनी बनेको छ। अर्कातर्फ, स्वावलम्बन लघुवित्त वित्तीय संस्था लिमिटेडको सेयर मूल्य ६.५४ प्रतिशतले घटेर सबैभन्दा धेरै गुमाउनेमा परेको छ। समग्रमा सबै उपसूचकहरू सकारात्मक रहँदा साताको अन्तिम दिनको सेयर बजार निकै उत्साहजनक देखिएको छ।
