जनार्दनको आरोप- कांग्रेस, एमाले र माओवादी छवि बचाउन असफल, मुलुक चरम भ्रष्टाचारमा [भिडियो]
हाम्रा कुरा
प्रकाशित २०८२ मंसिर ७ आइतबार
646
Shares
काठमाडौँ। नवगठित प्रगतिशील लोकतान्त्रिक पार्टीका नेता जनार्दन शर्माले आइतबार काठमाडौँमा आयोजित राष्ट्रिय एकता घोषणा सभालाई सम्बोधन गर्दै कांग्रेस, एमाले र माओवादी केन्द्रले आफ्नो क्रान्तिकारी छवि बचाउन नसकेकै कारण मुलुक चरम भ्रष्टाचार र परिणामविहीन अवस्थामा पुगेको गम्भीर आरोप लगाएका छन्।
उनले यी तीन प्रमुख पार्टीहरू लामो समय सत्तासीन भएपनि सामाजिक विभेद, प्रशासनिक सुधार र विकासका आधारभूत मुद्दाहरूलाई पर्याप्त प्राथमिकता दिन नसक्दा मुलुक असफल बन्न पुगेको बताए। प्रमुख राजनीतिक दलहरूले सुशासन र संरचनागत सुधारमा अपेक्षित परिणाम दिन नसकेको टिप्पणी गर्दै शर्माले मुलुकको विकासका लागि नीतिगत र प्रणालीगत पुनःसंरचना गर्नुको सट्टा मौजुदा संरचनाको दुरुपयोग गर्दै मुलुकलाई थप बर्बादीतर्फ धकेलेको आरोप लगाए।
शर्माले भने, “कांग्रेस, एमाले र माओवादी आआफ्नो समयका नागरिकको प्रतिनिधित्व गर्ने परिवर्तनकारी पार्टी नै थिए र हुन्। परन्तु इतिहासमा योगदान गरेका दलहरूले राज्यसत्तामा पुगेपछि आफ्नो क्रान्तिकारी छवि बचाउन नसक्दा असफल सिद्ध हुन पुगे। फलतः देश चरम भ्रष्टाचार, विकृति र चरम यथास्थितिमा कारण गति र परिणामविहीन हुन पुग्यो।” उनले यी दलहरू लामो समय सत्ताको वरिपरि रहेपनि सामाजिक उत्पीडन (जातीय, क्षेत्रीय, लैंगिक र वर्गीय विभेद) को सम्बोधन गर्न र देशमा भ्रष्टाचार, नातावाद, कृपावाद र दण्डहीनता नियन्त्रण गर्न असफल भएको दाबी गरे।
उनले पार्टीगत हितलाई भन्दा दीर्घकालीन संस्थागत सुधार, पारदर्शिता र उत्तरदायित्वमा ध्यान दिन सबै राजनीतिक शक्तिहरू जिम्मेवार हुनुपर्ने आवश्यकता समेत औंल्याए। शर्माले आम नागरिकले प्राप्त गर्न नसकेका अधिकारहरूको सुनिश्चितता गर्न आफ्नो पार्टी प्रतिवद्ध रहेको पनि बताए।
