छानबिन समिति बने संसद अवरोध हट्छ -माओवादी केन्द्र [भिडियो]
हाम्रा कुरा
प्रकाशित २०८२ जेठ २१ बुधबार
488
Shares
काठमाडौं। नेकपा (माओवादी केन्द्र) का प्रमुख सचेतक हितराज पाण्डेले भिजिट भिसाका नाममा भइरहेको मानव तस्करी सुशासनको मुख्य मुद्दा भएको बताएका छन्।
बुधबार संसद भवन परिसरमा सञ्चारकर्मीहरूसँग कुराकानी गर्दै पाण्डेले भिजिट भिसा प्रकरणका सम्बन्धमा प्रतिपक्षीले उठाएको मुद्दा गृहमन्त्रीको राजीनामाको विषय मात्र नभई सुशासनको विषय भएको स्पष्ट पारे। उनले भिजिट भिसाका नाममा भएको मानव तस्करीको विषयमा सरकारले संसदमा जवाफ दिएर छानबिन समिति बनाउन तयार भए संसदको कारबाही अघि बढाउन प्रतिपक्षी तयार रहेको पनि बताए।
पाण्डेले भने, “संवैधानिक आयोग अख्तियार दुरुपयोग अनुसन्धान आयोगले अनुसन्धान गरिरहेको र मुद्दा चलाइरहेको विषय भिजिट भिसा प्रकरणसँग मेल खाँदैन। यसमा त आम जनताले के-के भोगिरहेको छ भन्ने कुरा हेर्ने होला नि त। यो मूलतः सुशासनको विषय हो। उहाँहरू सहसचिव तीर्थ भट्टराईको मात्रै कुरा गर्नुहुन्छ!”
त्रिभुवन अन्तर्राष्ट्रिय विमानस्थल हुँदै वैदेशिक भ्रमणमा जाने नागरिकहरूसँग रकम असुली हुने गरेको आरोपमा अख्तियार दुरुपयोग अनुसन्धान आयोगले गृह मन्त्रालयका सहसचिव तीर्थ भट्टराई लगायत केही कर्मचारीहरू विरुद्ध अनुसन्धान अघि बढाएको छ। यस मुद्दालाई लिएर विपक्षी दलहरूले गृहमन्त्री रमेश लेखकको राजीनामाको माग गर्दै संसद बैठक अवरुद्ध गर्दै आएका छन्। संसद बैठक अवरोधकै कारण आगामी आर्थिक वर्षको बजेटमाथिको छलफल समेत प्रभावित भएको छ।
