काठमाडौं। नेपाली कांग्रेसका पुराना नेता नवराज गुरुङले आसन्न १४औं महाधिवेशनमा केन्द्रीय सदस्य पदमा उम्मेदवारी घोषणा गरेका छन् । मङ्गलवार रिपोर्टर्स क्लब नेपालमा पत्रकार सम्मेलन गरेर नेता गुरुङले कांग्रेसको १४औं महाधिवेशनमा (आदिवासी-जनजाति) तर्फबाट केन्द्रीय सदस्यमा उम्मेदवारी दिने घोषणा गरेका हुन् ।

नेता गुरुङले आदिवासी जनजातिहरू तथा अन्य समावेशीका जातिहरू सन्तुष्ट नभएको भन्दै पिछडिएका जातिहरूलाई नेपाली कांग्रेसको मूलधारमा ल्याई उनीहरूको बृहत्तर हितमा काम गर्नको लागि उम्मेदवारी दिन लागेको बताए । 

उम्मेदवारी घोषणा गर्दै नेता गुरुङले भने,‘महामन्त्रीमा लड्नुपर्ने तपाई पुरानो नेता किन सदस्यमा भनेर साथीहरूले नै भन्ने गरेको छन् । पटक-पटक चुनावमा हार व्यहोर्न परेको पीडा मसँग छ ।’

२०३२ सालदेखि विद्यार्थी आन्दोलनमा सक्रिय भूमिका निभाएका र ३३ सालमा विपी कोइरालाको राष्ट्रिय मेलमिलापको नीतिमा समेत साथ दिएका गुरुङले आफू पुराना नेता भए पनि विविध कारणले विगतमा उम्मेदवार बन्ने परिस्थिति नमिलेर आफू पछाडि परेको बताए । 

उम्मेदवारी पार्टीका साथीहरूको सल्लाहमा दिन लागेको बताउँदै उनले राजनीति भनेको राष्ट्रलाई दिने मात्र हो लिने आश गर्नुहुँदैन भन्दै आफुले पनि धेरै पटक पार्टीको लागि त्याग गरेको स्मरण गराए । 

गुरुङले मेचीदेखि महाकालीका जनजाति आदिवासीहरूलाई आफूलाई मत दिन आग्रह गर्दै सबैले भोट दिनेमा आफू विश्वस्त रहेको बताए ।  

गुरुङ २०४८ सालमा पर्वत क्षेत्र न.१ बाट प्रतिनिधिसभा सदस्यका लागि पार्टीको टिकट, २०५९ सालबाट प्रजातान्त्रिकको पर्वतको सभापति र ०६४ बाट ०६७ सम्म एकीकरणपछि कांग्रेसको पर्वत जिल्ला सभापति, ०७० सालमा संविधानसभा सदस्य र ०७४ सालमा प्रदेश सभाको उम्मेदवार भई प्रतिस्पर्धामा होमिएका थिए ।
 
२०२९ सालदेखि नेपाल विद्यार्थी सङ्घबाट राजनीतिमा सुरु गरेका गुरुङ सङ्घको केन्द्रीय उपाध्यक्षसमेत भएका थिए । गुरुङको नेविसंघमा धेरै ठुलो योगदान रहेको छ ।  

दुई तिहाईको कम्युनिस्टको सरकार आज आफ्नै कारणले तुहिएको भन्दै जनताको मागअनुसार नै नेपाली कांग्रेसले नेतृत्व गरेको उनको भनाई छ। शेरबहादुर देउवाले नचाहँदा नचाहँदै पनि सरकारको नेतृत्व गर्नुपरेको पनि उनले सुनाए ।  

जनजातिको छोराले अब कांग्रेसको नेतृत्व गर्नुपर्ने पनि उनले धारणा राखे । कांग्रेसले हिजो गुमाएको साख अब फेरी पाउने विश्वास रहेको उनले बताए । नेतृत्व तहमा असल व्यक्ति नपुगेमा दलकै अस्तित्व गुम्ने खतरा रहने भन्दै नेतृत्व छनौट गर्दा सोच-विचार पुर्‍याउन पर्नेमा उनको जोड थियो । पार्टी सभापति हुने हिम्मत आफूमा रहेको पनि उनले बताए । 

गुरुङले विभिन्न कारणले यसअघि महाधिवेशन रोकिए पनि अब कुनै पनि हालतमा कांग्रेसको १४औं महाधिवेशन नरोकिने विश्वास दिलाए । उनले आफ्नो समुदायभित्र नेपाली कांग्रेसको पक्षमा जागरण ल्याउनु आफ्नो मूल एजेन्डा भएको पनि सुनाए ।