निमा गरी लगातार तीन पटक नेपाली कांग्रेसको महासमिति सदस्यमा निर्वाचित युवा नेतृ हुन् । २०६२–६३ को आन्दोलनदेखि राजनीतिमा होमिएकी गिरी त्रिविवि नेविसंघको उपाध्यक्ष पनि हुन् । हाल उनी नेपाल महिला संघ प्यूठानकी सचिव छिन् ।  उनले ‘नेपाली कांग्रेस र महिला आन्दोलन’ तथा ‘स्थानीय तह र नेपाली कांग्रेस’ विषयक दुई वटा किताव पनि लेखेकी छिन् । प्यूठानमा उनले गरिब तथा असहायको लागि निःशुल्क कानुनी परामर्श तथा मुद्दा लड्ने गरेकी छिन् । गिरीले कांग्रेसको १४ औं महाधिवेशनमा महिला कोटाबाट केन्द्रीय सदस्य पदमा उम्मेदवारी दिने बताएकी छिन् । प्रस्तुत छ उनीसँग गरिएको कुराकानी–
० तपाई लगातार तीन पटक महाधिवेशन प्रतिनिधि हुनु भएको छ । अघिल्ला दुई वटा महाधिवेशनभन्दा यो महाधिवेशन केही फरक हुने आशा राख्नु भएको छ ?
० तीन वटा महाधिवेशनमध्ये पहिलो महाधिवेशन मेरो पहिलो प्रवेश थियो । त्यति अनुभव पनि थिएन । त्यतिखेर मैले सुशील कोइरालालाई भोट दिएकी थिएँ । उहाँ सभापति हुनुभयो । त्यतिबेला अरुले जे भन्छन् त्यही हो भन्ने अवस्थामा थिएँ । दोस्रो पटकमा पार्टीमा युवाहरुको प्रतिनिधित्व हुनुपर्छ भनेर देशभर एउटा अभियान सुरु गर्यौं । हामीले गरेको यस अभियान अन्तर्गत गगन थापा महामन्त्रीमा उठ्नु भयो । अहिले तेश्रो पटक हामी आफैं पनि परिपक्व भएका छौं । राष्ट्रिय राजनीति पनि बुझ्यौं । मैले नेविसंघको केन्द्रीय कोषाध्यक्ष भएर चुनाव लडेकी पनि हुँ । राष्ट्रिय राजनीतिमा सहभागी भएँ । कांग्रेस विचारविहीन भएको छ । कांग्रेसभित्र युवाको प्रतिनिधित्व छैन भन्दै गर्दा अहिले कांग्रेसमा ठूलो संख्यामा युवाको प्रतिनिधित्व भएको छ । अहिले कांग्रेसमा नयाँ विधान पनि आएको छ । यतिखेर  केन्द्रीय सदस्यको लागि म योग्य छु भन्ने मलाई लागेको छ । 

० भनेपछि यसपटक केन्द्रीय सदस्यमा उम्मेदवारी दिनुहुन्छ, होइन ?
० हो, यसपटक केन्द्रीय सदस्य पदमा उम्मेदवारी दिने सोच बनाएकी छु । 

० उम्मेदवारीको घोषणा गरिसक्नु भयो ?
० अब घोषणा गर्दैछु ।

० टिम बनाएर उम्मेदवारी दिनुहुन्छ ?
० टिममै रहन्छु होला ।

० कुन टिममा रहनुहुन्छ ?
० म व्यक्तिगत रुपमा जोडिएको टिम भनेको गगन थापाको टिम हो । उहाँ जहाँ हुनुहुन्छ त्यो टिममा म हुन्छु । 

० गगन थापाको टिममा पर्नुहुन्छ त ?
० त्यो टिममा पर्छु भन्ने मलाई लागेको छ ।  

० गगन थापाले तपाईलाई टिममा राख्छु भन्ने आश्वासन दिनु भएको छ ?
० आश्वासन भन्दा पनि मैले गरेको कामले उहाँले मलाई ‘तिमीले उम्मेदवारी देउ’ भन्नु हुनेछ । यसमा म विश्वस्त छु । यसपटक मैले गरेको कामको मूल्यांकंन हुनेछ ।

० जित्छु भन्नेमा विश्वस्त हुनुहुन्छ ? 
० जित्छु भन्नेमा विश्वस्त पनि छु । यसअघि मैले नेविसंघको महिला अध्यक्ष हुनुपर्छ भनेर क्याम्पियन गरेकी छु । मैले ६५–६६ जिल्ला घुमेकी छु । २–२ पटक महासमितिमा हुँदा करिब ६०–७० प्रतिशत महाधिवेशन प्रतिनिधि दोहोरिनु भएको छ । त्यहाँ मेरो नेटवर्क छ । मैले गरेको कामले म जित्छु भन्ने मलाई लागेको छ । 

० तपाई खुलाबाट लड्नु हुन्छ कि महिला कोटाबाट ?
० महिला कोटाबाट लड्छु । महिला कोटामा पनि खुला महिला र खस आर्य महिला भनी  छुट्टयाइएको छ । सम्भवतः खुला या खस आर्य महिला कोटाबाट चुनाव लड्ने छु । 

० तपाईंका एजेण्डाहरु के के छन् ?
० पहिलो एजेण्डा कांग्रेसभित्र पुस्तान्तरण मात्र होइन रुपान्तरण पनि हुनु पर्छ भन्ने हो । महिलाहरुको उपस्थितिको सवालमा उपस्थिति मात्र होइन निर्णायक हुनुपर्छ । निर्णय गर्ने ठाउँमा महिला पुग्नु पर्छ भन्ने मेरो एजेण्डा हो । कांग्रेसभित्र महिलाको सहभागिता महत्वपूर्ण हुनुपर्छ भन्ने मेरो कुरा हो ।

० किन टिमबाटै उठ्छु भन्नु भयो ? टिममा नपरेर स्वतन्त्र पनि उठ्न सक्नुहुन्छ होइन र ?
० त्यस्तो होइन हामीले राजनीति बुझेका छौं  । स्वतन्त्र उठ्दा भोट त आउँछ तर जित्ने सवालमा टिममै जानुपर्छ । स्वतन्त्र उठ्दा हाम्रा माग एजेण्डा छुट्टयाइन्छन् । टिममा रहँदा हामीले हाम्रा एजेण्डा लागु गर्न सक्छौं । एकता नै बल हो भन्ने छ ।

० यसपटक नेतृत्व पनि परिवर्तन हुन्छ, होइन ?
० यसपटक नेतत्व पनि परिवर्तन हुनुपर्छ ।