काठमाडौँ । इजिप्टका राष्ट्रपति अब्देल फतह अल–सिसीले सन् २०२६ को फिफा विश्वकपमा देशकै इतिहासमा सर्वोत्कृष्ट र ऐतिहासिक प्रदर्शन गरेको भन्दै शनिबार राष्ट्रिय फुटबल टोलीका खेलाडी, प्रशिक्षक तथा प्रशासनिक कर्मचारीहरूलाई विशेष सम्मान गरेका छन्। न्यु अलामेन शहरमा आयोजित एक भव्य समारोहका बीच राष्ट्रपति सिसीले टोलीलाई ‘मेरिट कप’ र विभिन्न प्रतिष्ठित मानपदवी प्रदान गरेका हुन्।
टोलीले प्रतियोगिताका क्रममा प्रदर्शन गरेको उत्कृष्ट प्राविधिक कौशल, दृढता, अनुशासन र साहसिक खेलको उच्च कदर गर्दै उक्त सम्मान प्रदान गरिएको इजिप्टको राष्ट्रपतिको कार्यालयले जनाएको छ। समारोहलाई सम्बोधन गर्दै राष्ट्रपति सिसीले खेलकुद केवल जित र हारमा मात्र सीमित नहुने धारणा व्यक्त गरे। उनले खेलाडीहरूले मैदानमा देखाएको देशप्रतिको निष्ठा र खेल भावनाको प्रशंसा गर्दै यसले युवा पुस्तालाई थप प्रेरित गर्ने विश्वास व्यक्त गरे।
सन् २०२६ को विश्वकपमा इजिप्ट पहिलो पटक प्रतियोगिताको अन्तिम १६ (राउन्ड अफ १६) सम्म पुग्न सफल भएको थियो। ३२ औँ चरणको खेलमा अष्ट्रेलियालाई पेनाल्टी सुटआउटमा ४–२ ले पराजित गर्दै इजिप्टले यो ऐतिहासिक सफलता प्राप्त गरेको हो। यसै संस्करणको समूह चरणको खेलमा न्युजिल्याण्डलाई ३–१ ले हराउँदै इजिप्टले विश्वकपको इतिहासमा आफ्नो पहिलो जित समेत दर्ता गरेको थियो।
इजिप्टको विश्वकप यात्रा जुलाई ७ मा अमेरिकाको एटलान्टामा साविक विजेता अर्जेन्टिनासँगको कडा प्रतिष्पर्धापछि टुङ्गिएको थियो। अत्यन्तै रोचक सो खेलमा इजिप्टले शुरुवाती २–० को अप्रत्याशित अग्रता लिए पनि खेलको अन्तिम समयमा तीन गोल व्यहोर्नुपर्दा ३–२ को हार ब्यहोर्न पुगेको थियो। अर्जेन्टिनाले इन्जुरी समयमा निर्णायक गोल गर्दै जित हात पारेको थियो, तर पराजित भए पनि इजिप्टियन टोलीले विश्वभरका फुटबल प्रेमीको मन जित्न सफल भयो।
