काठमाडौँ। नेपालको निजी क्षेत्रको अग्रणी वित्तीय संस्था नबिल बैङ्क लिमिटेड स्थापनाको ४२औँ वर्ष पूरा गरी नयाँ ऐतिहासिक यात्रामा प्रवेश गरेको छ। स्थापनाकालदेखि नै नेपाली बैङ्किङ क्षेत्रमा आधुनिक प्रविधिको सुरुआत गर्दै आएको यस बैङ्कले आफ्नो ४२औँ वार्षिकोत्सवको अवसरमा परम्परागत बैङ्किङको सीमाभन्दा माथि उठेर वित्तीय सेवा प्रदान गर्ने प्रतिबद्धता व्यक्त गरेको छ। बैङ्कले यस ऐतिहासिक घडीमा ग्राहक, समुदाय र समग्र देशको अर्थतन्त्रका लागि समावेशी र समृद्ध भविष्य निर्माण गर्ने उद्देश्यका साथ ‘बैङ्किङ एण्ड बियोन्ड’ अवधारणालाई अझ सबल रूपमा अघि सारेको हो।

"विश्वास हाम्रो सम्पत्ति, नवप्रवर्तन हाम्रो डिएनए"- अध्यक्ष निर्वाणकुमार चौधरी
वार्षिकोत्सवका अवसरमा बैङ्कका अध्यक्ष निर्वाणकुमार चौधरीले सम्बोधनमार्फत बैङ्कको विगत, वर्तमान र भविष्यको मार्गचित्र स्पष्ट पारे। विगत ४२ वर्षदेखि नबिल बैङ्कको मुटुमा केवल एउटा कुरा मात्र धड्किरहेको र त्यो 'विश्वास' भएको उनले बताए।

अध्यक्ष चौधरीले भने, “आज नबिल बैङ्क ४२ वर्षको उत्कृष्ट यात्राको साक्षी बनिरहँदा म सम्पूर्ण ग्राहक, शेयर धनी, नियामक निकाय, साझेदार र हाम्रा समर्पित कर्मचारीहरूप्रति कृतज्ञता व्यक्त गर्दछु। यो विश्वास नै हाम्रो सबैभन्दा ठूलो सम्पत्ति हो र यो नै हाम्रो भविष्यको बलियो जग बन्नेछ।”

उनले विगत चार दशकमा नेपालको आर्थिक र औद्योगिक परिदृश्यमा ठूलो परिवर्तन भएको चर्चा गर्दै नबिल बैङ्कले कहिल्यै पनि परिवर्तनको प्रतीक्षा नगरेको बरु सधैँ त्यसको नेतृत्व गरेको बताए। “हामीले आधुनिक बैङ्किङको जग बसाल्यौँ। ‘एन बैङ्क’ एप मार्फत नेपालको पहिलो डिजिटल बैङ्कका रूपमा आफूलाई स्थापित गर्दै ग्राहकको बैङ्किङ अनुभवलाई पूर्ण रूपमा बदल्यौँ,” अध्यक्ष चौधरीले भने, “नेपालकै पहिलो निजी वाणिज्य बैङ्क स्थापना गर्दै हामीले उद्योग र लगानीकर्ताका लागि नयाँ ढोका खोल्यौँ। आज नबिल बैङ्क नेपालको एक मात्र यस्तो वित्तीय समूह हो, जसले एउटै छानामुनि वाणिज्य बैङ्किङ, इन्भेस्टमेन्ट बैङ्किङ, स्टक ब्रोकर, मर्चेन्ट बैङ्किङ, क्यापिटल मार्केट र डिजिटल बैङ्किङसहितको पूर्ण वित्तीय इकोसिस्टम प्रदान गरिरहेको छ। हामीले नवप्रवर्तन केवल अपनाउने मात्र गरेका छैनौँ, यो नबिलको डिएनए मै छ।”

आर्टिफिसियल इन्टेलिजेन्स (एआई) को युगमा नबिलको नेतृत्वदायी भूमिका
सम्बोधनका क्रममा अध्यक्ष चौधरीले बैङ्किङ इतिहासकै सबैभन्दा ठूलो रूपान्तरणकारी युग अर्थात् ‘आर्टिफिसियल इन्टेलिजेन्स’ (एआई) को युगमा बैङ्क प्रवेश गरेको घोषणा गरे। एआई केवल एउटा सामान्य प्रविधि मात्र नभई यसले निर्णय प्रक्रिया, जोखिम व्यवस्थापन, व्यवसाय सञ्चालन र ग्राहकको वित्तीय अनुभवलाई नै पुनः परिभाषित गरिरहेको उनले बताए।

नबिल बैङ्कले यस परिवर्तनमा केवल सहभागी मात्र नभई यसको नेतृत्व गर्ने तयारी गरिसकेको जानकारी दिँदै उनले भने, “एन बैङ्कको अबको विकासमा एआईलाई केन्द्रबिन्दुमा राखिनेछ। यसले बैङ्किङ सेवालाई अझ स्मार्ट र व्यक्तिगत बनाउनेछ। यसबाट द्रुत कर्जा प्रवाह, उत्कृष्ट जोखिम व्यवस्थापन, बौद्धिक ग्राहक अनुभव, व्यापक वित्तीय समावेशीकरण र मजबुत सुरक्षा प्रणालीको विकास हुनेछ। प्रविधि जतिसुकै बौद्धिक बने पनि हाम्रो मूल उद्देश्य सधैँ मानवीय भावना र मूल्यमान्यतासँगै जोडिनेछ, किनकि बैङ्किङ केवल वित्तीय कारोबार मात्र होइन, यो सपनाहरू साकार पार्ने, उद्यमीहरूलाई सघाउने, परिवारको भविष्य निर्माण गर्ने र नेपालको समृद्धिमा योगदान दिने माध्यम हो।”

तीव्र वित्तीय वृद्धि र रणनीतिक कार्यसम्पादन 
यसै गरी, बैङ्कका प्रमुख कार्यकारी अधिकृत (सिइओ) मनोजकुमार ज्ञवालीले बैङ्कको सुखद यात्रामा अनवरत साथ र सहयोग दिने सम्पूर्ण सरोकारवालाहरूप्रति आभार प्रकट गरे। सन् १९८४ मा नेपालकै पहिलो प्रविधिमैत्री निजी क्षेत्रको बैङ्कका रूपमा सुरु भएको यो यात्रा आज लाखौँ ग्राहकको अटुट विश्वास र हजारौँ कर्मचारीको निष्ठाका कारण यो गौरवमय उचाइसम्म आइपुगेको उनले बताए। 

“यस ऐतिहासिक उपलब्धिको उत्सव मनाउँदै गर्दा, हामी हाम्रा ग्राहकहरू र राष्ट्रका लागि दिगो मूल्य सिर्जना गर्न थप आत्मविश्वास, नवीनता र प्रतिबद्धताका साथ भविष्यतर्फ हेरिरहेका छौँ। हामी केवल बैङ्किङ सेवा दिने संस्था होइनौँ, हामी तपाईँका सपना, सम्भावना र सफलताको यात्रामा साथ दिने भरोसायोग्य साझेदार हौँ। हाम्रो लागि यही हो बैङ्किङ एण्ड बियोन्ड,” सिइओ ज्ञवालीले भने। 

ग्राहकहरूको बदलिँदो बैङ्किङ अपेक्षा र दिगो विकासको आवश्यकतालाई ध्यानमा राख्दै बैङ्कले ‘नेपालको सबैभन्दा विश्वासिलो, भरपर्दो र भविष्यका लागि तयार बैङ्क’ बन्ने दृढ सङ्कल्प लिएको छ। देशको आर्थिक विकासका लागि रणनीतिक र उत्पादनशील क्षेत्रमा लगानी बढाउँदै

लगेको बैङ्कले हालसम्म विभिन्न क्षेत्रमा गरेको कर्जा लगानीको अवस्था यस प्रकार छ: 

• कृषि क्षेत्र: रु. ५३ अर्ब ३१ करोड 
• ऊर्जा क्षेत्र: रु. ५१ अर्ब ६ करोड 
• लघु, घरेलु, साना तथा मझौला उद्योग: रु. ४५ अर्ब ९२ करोड 
• पर्यटन क्षेत्र: रु. ११ अर्ब, १० करोड 

प्रमुख वित्तीय सूचकाङ्कमा अभूतपूर्व प्रगति
विगत ४२ वर्षको अवधिमा बैङ्कले वित्तीय बजारमा आफ्नो अभूतपूर्व उपस्थिति जनाएको छ: 

• नेटवर्क र नाफा: आर्थिक वर्ष २०४१/४२ मा बैङ्कको कुल नेटवर्क रु. २ करोड ८० लाख र खुद नाफा रु. १० लाख रहेकामा चालू आर्थिक वर्ष २०८२/८३ को तेस्रो त्रैमाससम्म आइपुग्दा नेटवर्क रु. ७० अर्ब ८३ करोड र खुद नाफा रु. ६ अर्ब ७६ करोड पुगेको छ। 
• निक्षेप र कर्जा: सुरुआती चरणमा रु. १४ करोड ६० लाख मात्र रहेको निक्षेप सङ्कलन बढेर रु. ५ खर्ब ८८ अर्ब ८५ करोड पुगेको छ भने कर्जा प्रवाह पनि रु. १३ करोड ३० लाखबाट बढेर रु. ४ खर्ब ६४ अर्ब १० करोड पुगेको छ। कुल सम्पत्ति पनि रु. २६ करोड ९० लाखबाट बढेर रु. ७ खर्ब १८ अर्ब ४२ करोड पुगेको छ। 
• नेटवर्क सञ्जाल: २ शाखा र १४४ कर्मचारीबाट सुरु भएको सेवा सञ्जाल अहिले देशैभर २६४ शाखा, ३१५ एटिएम, १८ एक्सटेन्सन काउन्टर र २,४६९ दक्ष कर्मचारीहरूसम्म विस्तार भई २६ लाखभन्दा बढी ग्राहकहरूलाई सेवा प्रदान गरिरहेको छ।

वार्षिकोत्सवका ग्राहक-केन्द्रित विशेष योजना र अफरहरू

• यो ऐतिहासिक ४२औँ वार्षिकोत्सवलाई उत्सवमय बनाउन नबिल बैङ्कले ४२ दिन लामो विशेष प्रवर्द्धनात्मक कार्यक्रम तथा सामाजिक उत्तरदायित्वका योजनाहरू सार्वजनिक गरेको छ: 
• पुनः निर्माण घर कर्जा योजना: हेटौँडा र वीरगन्ज क्षेत्रमा सडक विस्तारका कारण प्रभावित भएकाहरूका लागि लक्षित गरी बैङ्कले यो योजना ल्याएको हो । आधार दर मा मात्र ०.५ प्रतिशत प्रिमियम ब्याजदर थप गरी सहुलियतपूर्ण कर्जा उपलब्ध गराइने बैङ्कले जनाएको छ। 
• लक्कर र गेटवेमा छुट अफर: बैङ्कले लक्कर सेक्युरिटी डिपोजिट, क्रेडिट कार्ड, डेबिट कार्ड र इलेकट्रोनिक पेमेन्ट गेटवे (इपिजी) जस्ता सेवा लिन चाहने ग्राहकका लागि विशेष योजना ल्याएको छ । लक्कर सेक्युरिटी डिपोजिट सुविधा लिन चाहने ग्राहकले ४२ प्रतिशत छुट पाउने छन् भने इपिजी सेवा लिन चाहने ग्राहकले १५ हजार रुपैयाँको इन्टिग्रेसन शुल्कमा ५० प्रतिशत छुट पाउनेछन् । 
• क्रेडिट र डेबिट कार्ड अफर: क्रेडिट कार्डका लागि आवेदन दिने ग्राहकले आवेदन शुल्क र एक वर्षको सदस्यता शुल्कमा पनि छुट पाउनेछन् । यी सुविधाहरू बैङ्कको वार्षिकोत्सवको अवसरमा ४२ दिनसम्म लागू हुनेछन् । डेबिट कार्डका हकमा भने वार्षिकोत्सवकै दिन आवेदन दिने ग्राहकले चार वर्षसम्म डेबिट कार्ड प्रयोग गर्न पाउनेछन्। 

नबिल बैङ्कले देशभर २६४ शाखा सञ्जालसहित ३१५ एटिएम मेसिनबाट सेवा प्रदान गर्दै आएको छ । बैङ्कले २६ लाखभन्दा बढी ग्राहकलाई बैङ्किङ सेवा प्रदान गर्दै आएको तथा आफ्ना सबै सरोकारवालासँग सहकार्य गर्दै अघि बढ्ने विश्वास राखेको छ । चार दशकदेखि गुणस्तरीय बैङ्किङ सेवा प्रदान गर्दै आएको बैङ्कले पछिल्लो समयमा दिगो बैङ्किङको अवधारणालाई आत्मसात् गर्दै डिजिटल बैङ्किङका लागि एनबैङ्क सञ्चालनमा ल्याएको छ।