आर्थिक र राष्ट्र ऋण विधेयक टेबुल गरिँदै, थप मन्त्रालयको बजेटमाथि छलफल हुँदै
हाम्रा कुरा
प्रकाशित २०८३ असार १९ शुक्रबार
232
Shares
काठमाडौँ । सङ्घीय संसद्अन्तर्गत राष्ट्रिय सभाको बैठक आज शुक्रबार अपराह्न १:१५ बजे सिंहदरबारमा बस्ने भएको छ। आजको बैठकमा विशेषगरी बजेटमाथिको मन्त्रालयगत छलफललाई निरन्तरता दिने र प्रतिनिधि सभाबाट प्राप्त महत्त्वपूर्ण विधेयकहरू सदनमा पेस गर्ने कार्यसूची तय गरिएको छ।
संसद् सचिवालयका अनुसार बैठकको सुरुवातमै राष्ट्रिय सभाका सचिव तुलबहादुर कँडेलले प्रतिनिधि सभाबाट पारित भई प्राप्त भएका ‘आर्थिक विधेयक, २०८३’ र ‘राष्ट्र ऋण उठाउने विधेयक, २०८३’ का सम्बन्धमा प्राप्त सन्देशहरू सभासमक्ष टेबुल गर्नेछन्। यी विधेयकहरू राष्ट्रिय सभामा टेबुल भएसँगै बजेट आश्रित अन्य कानुनी प्रक्रिया अघि बढाउने बाटो खुल्नेछ।
त्यसपछि बैठकमा विनियोजन विधेयक, २०८३ का बाँकी विभिन्न शीर्षकहरूमाथि समूहीकृत रूपमा छलफल सुरु हुनेछ। आजको कार्यसूचीमा उद्योग, वाणिज्य तथा आपूर्ति मन्त्रालय, कृषि, वन तथा पर्यावरण मन्त्रालय, पूर्वाधार विकास मन्त्रालय र गृह मन्त्रालयको विनियोजन शीर्षकमाथि छलफल हुने उल्लेख छ। यसका साथै ऊर्जा, जलस्रोत तथा सिँचाइ मन्त्रालय, परराष्ट्र मन्त्रालय, अर्थ मन्त्रालय र रक्षा मन्त्रालयका बजेट शीर्षकहरूमाथि पनि सांसदहरूले आ-आफ्नो धारणा राख्नेछन्।
मन्त्रालयहरूका अतिरिक्त मुलुकका शीर्ष सार्वजनिक निकायहरूको बजेटमाथि पनि आजै छलफल गरिनेछ। जसअनुसार राष्ट्रपतिको कार्यालय, उपराष्ट्रपतिको कार्यालय, प्रधानमन्त्री तथा मन्त्रिपरिषद्को कार्यालय र राष्ट्रिय योजना आयोगको सचिवालयसम्बन्धी विनियोजन शीर्षकहरू छलफलका मुख्य विषय बन्नेछन्।
