काठमाडौँ । नेपाल उद्योग वाणिज्य महासङ्घका अध्यक्ष चन्द्रप्रसाद ढकालले मुलुकको आर्थिक गतिलाई तीव्रता दिन नयाँ चरणको आर्थिक सुधार र लगानीमैत्री वातावरण अपरिहार्य रहेको बताएका छन्। महासङ्घको ६०औँ वार्षिक साधारण सभाको उद्घाटन सत्रलाई सम्बोधन गर्दै उनले निजी क्षेत्रको मनोबल बढाउन र नीतिगत स्थायित्व कायम गर्न सरकारको ध्यानाकर्षण गराएका हुन्।

महासङ्घको ६० वर्षे यात्रा: सङ्कल्प र साझेदारीको प्रतीक
अध्यक्ष ढकालले महासङ्घको ६० वर्षे इतिहास केवल वर्षहरूको गणना मात्र नभई, देशको आर्थिक मेरुदण्डलाई मजबुत बनाउन थपिएका दृढ सङ्कल्प, सङ्घर्ष र साझेदारीका सुनौला इँटाहरू भएको बताए। "विगतका कठिन परिस्थिति, राजनीतिक अस्थिरता, दैवी प्रकोप र आन्तरिक तथा बाह्य आर्थिक चुनौतीका बीच पनि महासङ्घले आफ्नो भूमिकालाई कहिल्यै कमजोर हुन दिएको छैन," उनले भने, "प्रत्येक चुनौतीलाई अवसरमा बदल्दै देशको आर्थिक गतिलाई अघि बढाउने सशक्त अगुवाको रूपमा महासङ्घ उभिएको छ।"

उनले साना, मझौला र ठूला सबै व्यवसायीहरूलाई एउटै मञ्चमा जोड्दै सामूहिक समृद्धिको सपना साकार पार्न महासङ्घले महत्त्वपूर्ण भूमिका खेलेको स्मरण गरे।

निजी क्षेत्र प्रवर्द्धन एवं संरक्षण रणनीति (पीएसपीपी) को स्वागत
अध्यक्ष ढकालले वर्तमान सरकारको पहिलो मन्त्रिपरिषद् बैठकले महासङ्घको आग्रहबमोजिम 'निजी क्षेत्र प्रवर्द्धन एवं संरक्षण रणनीति' (पीएसपीपी) पारित गरी तत्काल लागू गर्ने निर्णय गरेकोमा सरकारप्रति आभार व्यक्त गरे। उनले २०४६ सालयताका आन्दोलनहरूमा निजी क्षेत्र प्रभावित हुँदै आएको सन्दर्भमा यो रणनीतिले व्यवसायीहरूलाई भौतिक र नीतिगत सुरक्षाको प्रत्याभूति दिने विश्वास व्यक्त गरे।

साथै, दोस्रो चरणको आर्थिक सुधारका लागि गठित उच्चस्तरीय सुझाव आयोगले पेस गरेका सुझावहरू कार्यान्वयन गर्ने क्रममा अर्थमन्त्रीले केही कानुन खारेजीको प्रक्रिया अगाडि बढाएको भन्दै उनले त्यसको स्वागत गरे।

स्थायी सरकार: मुलुकका लागि अभूतपूर्व अवसर
संसद्‌मा झन्डै दुई तिहाइ बहुमतसहितको स्थायी सरकार गठन हुनु मुलुकका लागि अभूतपूर्व अवसर भएको अध्यक्ष ढकालको भनाइ छ। उनले भने, "सरकारको यो स्थायित्वलाई मुलुकको विकास र सबै क्षेत्रमा स्थायित्व प्रदान गर्ने अवसरका रूपमा सदुपयोग गरिनुपर्छ। हामीले काम गर्‍यौँ र निजी क्षेत्रले सम्मानित भएर व्यवसाय गर्न पायो भने हामीसँग प्रगति गर्ने अवसरहरू विश्वका अरू मुलुकको तुलनामा अत्यधिक छन्।"

रोजगारी सिर्जना र आर्थिक वृद्धिको चुनौती
नेपालको 'मिडियन उमेर' २५ वर्ष रहेको र छिमेकी मुलुकहरूसँग प्रशस्त बजार सम्भावना भए पनि त्यसको पूर्ण उपयोग हुन नसकेको अध्यक्ष ढकालले औँल्याए। वर्षेनी करिब सात लाख युवा रोजगारीको खोजीमा बिदेसिने गरेको सन्दर्भ जोड्दै उनले स्वदेशमै मर्यादित र उच्च ज्यालासहितको रोजगारी सिर्जना गर्नुपर्ने आवश्यकतामा जोड दिए। "रोजगारी प्रदान गर्न सरकारको सीमितता छ, तर ८६ प्रतिशत रोजगारी अहिले पनि निजी क्षेत्रले नै दिइरहेको छ। त्यसैले निजी क्षेत्रलाई सुरक्षित भई सम्मानित रूपमा काम गर्ने वातावरण बनाउनुपर्छ," उनले थपे।

स्वदेशी पुँजी परिचालन र विदेशी लगानी आकर्षण
लगानी बढाउनु मुख्य ध्येय हुनुपर्ने बताउँदै अध्यक्ष ढकालले महासङ्घको पहलमा १० अर्ब रुपैयाँ चुक्ता पुँजी भएको 'नेपाल डेभलपमेन्ट पब्लिक लिमिटेड कम्पनी' स्थापना भई काम सुरु भइसकेको जानकारी दिए। "१० अर्ब पुँजीलाई 'इक्विटी' का रूपमा मान्ने हो भने ४० देखि ५० अर्बसम्मका ठूला आयोजना अगाडि बढाउन सकिन्छ," उनले भने, "यसले नेपालमा केही हुँदैन भन्ने भाष्यलाई चिर्नेछ।"

त्यस्तै, विदेशी प्रत्यक्ष लगानी (एफडीआई) भित्र्याउन सुशासन पूर्व सर्त रहेको भन्दै उनले प्रविधिको उच्चतम प्रयोगमार्फत 'नागरिक एप' बाटै व्यवसाय दर्तालगायतका सम्पूर्ण काम गर्न सकिने व्यवस्था मिलाउन सरकारसँग आग्रह गरे।

निराशा होइन, आशा छरौँ
आफ्नो सम्बोधनको अन्त्यमा अध्यक्ष ढकालले व्यवसायीहरूलाई सकारात्मक सोच र सिर्जनात्मक कामका साथ निरन्तर अघि बढ्न अपिल गरे। "कोरोना महामारी र भूकम्पजस्ता सङ्कटले थला पारेको अर्थतन्त्रलाई हामीले धुलो टक्टकाउँदै उठायौँ," उनले भने, "हामीसँग धैर्य र संयम छ। प्रतिकूलतामा अनुकूलता खोज्दै निराशा होइन, आशा छर्दै अघि बढौँ। भोलिका दिनहरू पक्कै सुनौला हुनेछन्।"