निजामती विधेयकको मस्यौदामा ३५ सयभन्दा बढी सुझाव, अध्ययनमा मन्त्रालय
हाम्रा कुरा
प्रकाशित २०८३ वैशाख १५ मंगलबार
325
Shares
काठमाडौँ । सङ्घीय शासन प्रणालीलाई सुदृढ बनाउने उद्देश्यले तयार पारिएको ‘सङ्घीय निजामती सेवा विधेयक’ को प्रारम्भिक मस्यौदामाथि सरोकारवालाहरूले ठूलो चासो देखाएका छन्। सङ्घीय मामिला तथा सामान्य प्रशासन मन्त्रालयका अनुसार मस्यौदा सार्वजनिक भएको छोटो अवधिमै ३५ सय भन्दा बढी राय, सुझाव र पृष्ठपोषण प्राप्त भएका छन्।
मन्त्रालयले यही वैशाख ११ गते आफ्नो आधिकारिक वेबसाइटमा विधेयकको मस्यौदा प्रकाशन गरेको थियो। प्राप्त सुझावहरूलाई व्यवस्थित रूपमा अध्ययन र विश्लेषण गर्न प्रशासन सुधार महाशाखा प्रमुखको संयोजकत्वमा एक कार्यसमूह गठन गरिएको छ। उक्त कार्यसमूहले औपचारिक माध्यमबाट आएका सुझावका साथै सामाजिक सञ्जालमा व्यक्त भएका प्रतिक्रियाहरूको समेत सङ्कलन र विश्लेषण गरिरहेको छ।
मन्त्रालयले हाल सार्वजनिक गरिएको मस्यौदा प्रारम्भिक मात्र भएको स्पष्ट पार्दै यसमा सुधारका धेरै ठाउँहरू रहेको स्वीकार गरेको छ। मस्यौदालाई अन्तिम रूप दिनुअघि प्राप्त सुझावहरूको औचित्य र उपयुक्तताका आधारमा तिनलाई समावेश गरिनेमा मन्त्रालयले सबैलाई आश्वस्त पारेको छ।
विधेयकलाई अझ बढी प्रभावकारी र कर्मचारीमैत्री बनाउन मन्त्रालयले थप सुझावहरू आह्वान गरेको छ। इच्छुक व्यक्ति वा निकायले कार्यसमूहको इमेल तथा ह्वाट्एप नम्बरमार्फत आफ्ना राय पठाउन सक्नेछन्। यस प्रक्रियाले सङ्घीय निजामती सेवालाई थप समावेशी र कार्यकुशल बनाउन सहयोग पुग्ने अपेक्षा गरिएको छ।
