सिमकोटमा कांग्रेस प्रवेशको लहर : ३१ जना नवप्रवेशी कांग्रेसमा आबद्ध
जनकबहादुर शाही,
प्रकाशित २०८२ फागुन १७ आइतबार
1.9k
Shares
हुम्ला । सिमकोट गाउँपालिका–स्याडामा ३१ जना स्थानीय बासिन्दा औपचारिक रूपमा नेपाली कांग्रेसमा प्रवेश गरेका छन् । कर्णालीका पूर्व मुख्यमन्त्री तथा कांग्रेसका नेता जीवनबहादुर शाहीको विशेष उपस्थितिमा आयोजित कार्यक्रममा उनीहरूले नेपाली कम्युनिस्ट पार्टी र नेपाल कम्युनिस्ट पार्टी (एमाले) परित्याग गरी कांग्रेसमा आबद्धता जनाएका हुन् ।
कार्यक्रममा नवप्रवेशीहरूलाई खादा तथा टीका लगाएर स्वागत गरिएको थियो। स्थानीय नेता–कार्यकर्ता, शुभेच्छुक तथा सर्वसाधारणको उल्लेखनीय उपस्थितिमा कार्यक्रम उत्साहपूर्ण बनेको थियो।
कार्यक्रमलाई सम्बोधन गर्दै नेता शाहीले लोकतन्त्र, समावेशिता र विकासप्रतिको प्रतिबद्धताका कारण जनतामा कांग्रेसप्रति विश्वास बढ्दै गएको बताए। “कांग्रेस केवल पार्टी मात्र होइन, जनताको भरोसा र परिवर्तनको मार्ग हो,” उनले भने। उनले हुम्लाको शिक्षा, स्वास्थ्य, सडक र रोजगारीका क्षेत्रमा दीर्घकालीन योजना अघि बढाइने प्रतिबद्धता व्यक्त गरे ।
स्थानीय राजनीतिक विश्लेषकहरूका अनुसार स्याडामा भएको यो सामूहिक प्रवेशलाई जिल्लामा कांग्रेसप्रतिको बढ्दो आकर्षणका रूपमा लिइएको छ ।
नवप्रवेशीहरूले लोकतान्त्रिक मूल्य–मान्यता सुदृढ गर्दै समुन्नत हुम्ला निर्माणमा सक्रिय भूमिका खेल्ने प्रतिबद्धता व्यक्त गरेका छन् । सामूहिक प्रवेशले जिल्लामा कांग्रेस संगठनलाई थप सुदृढ, एकताबद्ध र ऊर्जावान बनाउने विश्वास गरिएको छ।
