काठमाडौँ । चाडबाड लागेसँगै गाउँघरमा चोकचौतारीमा पिङ राखेर खेल्ने चलन पुरानो हो । बहुदलपछि यस्ता चलन हराउँदै गए । अझ मोबाइल दुनियाँ आएपछि त झन् पिङ खेल्ने पाटो झन् हरायो । किनकि बालबालिकाहरु मोबाइलमा झुम्मिन थाले ।
तर पछिल्ला केही वर्षदेखि भने पुरानो संस्कृतिलाई जोगाउन ठाउँठाउँमा युवाहरु जागेका छन् । स्थानीय तहले पनि यस्ता संस्कृति बचाउन निश्चित सहयोग गर्दै आएको छ ।
त्यसो त दशैँका बेला धर्ती छाड्नुपर्छ भन्ने मान्यताका आधारमा एकपटक पिङ खेल्नुपर्छ भन्ने मान्यता छ । काठमाडौँ वरिपरि डाँडाहरुतिर पिङ हालिएको देखिन्छ ।
गोकर्णेश्वर नगरपालिका र बुढानीलकण्ठ नगरपालिकाको सीमा क्षेत्रमा रहेको तारेभिर नारायणडाँडामा हालिएको लिंगेपिङ खेलेर बालबालिकाहरु रमाएका छन् ।
