नेकपाका ८१ जना नेता कार्यकर्ता पक्राउ, उपत्यकाका सडकमा ४५ सय प्रहरी परिचालन

नेकपाका ८१ जना नेता कार्यकर्ता पक्राउ, उपत्यकाका सडकमा ४५ सय प्रहरी परिचालन

हाम्राकुरा संवाददाता,

प्रकाशित २०७७ माघ २२ बिहिबार

काठमाडौं। नेकपाको प्रचण्ड-माधव समूहले बिहिबार गरेको आम हडताल क्रममा प्रहरीले काठमाडौं उपत्यकाबाट अहिलेसम्म ८१ जनालाई पक्राउ गरेको छ । महानगरीय प्रहरी कार्यालय रानीपोखरीका प्रवक्ता एसपी शुशिलसिंह राठोरका अनुसार नेकपाको प्रचण्ड-नेपाल समूहले गरेको हड्तालका क्रममा बिहिबार साढे २ बज्दासम्म ८१ जना नेता कार्यकर्ता पक्राउ गरिएको जानकारी दिए ।

उनका अनुसार प्रहरीले सवारीलाई अवरोध गर्ने, पसल बन्द गराउँदै हिड्ने र सवारी साधनमा तोडफोड गर्नेहरूलाई पक्राउ गरेको हो । उपत्यकाका तीन जिल्ला काठमाडौं, भक्तपुर र ललितपुरमा प्रहरीले सुरक्षा व्यवस्था मजबुत बनाउन र सम्भावित क्षति रोक्न भन्दै ४ हजार ५ सय भन्दा बढी प्रहरी परिचालन गरेको जनाएको छ ।

नेकपा नेतृ पम्फा भुसालले भने नेकपा स्थायी समिति सदस्य अष्टलक्ष्मी शाक्यसहित काठमाडौंबाट ७८ जना र ललितपुरबाट चार जनालाई प्रहरीले पक्राउ गरिसकेको जानकारी दिइन ।