परराष्ट्र मन्त्रीको विदेश भ्रमणदेखि बेरुजु उपसमिति गठनसम्म समितिमा छलफल हुँदै
हाम्रा कुरा
प्रकाशित २०८३ असार २३ मंगलबार
363
Shares
काठमाडौँ । सङ्घीय संसद्अन्तर्गत आज एकै दिन चार ओटा संसदीय समितिका बैठकहरू बस्दैछन्। बिहानैदेखि फरक-फरक समयमा बस्ने यी बैठकहरूमा मुलुकको परराष्ट्र नीति, विधेयक, सामाजिक तथा आर्थिक सुशासनका विविध विषयमा गहन छलफल हुने कार्यसूची तय भएको छ।
आजको सबैभन्दा बढी चासोका साथ हेरिएको अन्तर्राष्ट्रिय सम्बन्ध र पर्यटन समितिको बैठक बिहान साढे ९ बजे बस्दैछ। उक्त बैठकमा परराष्ट्र मन्त्रीको हालै भएका भारत र चीन भ्रमणका उपलब्धि तथा अन्य समसामयिक कूटनीतिक विषयहरूमा समितिलाई औपचारिक जानकारी गराउने मुख्य कार्यसूची रहेको छ।
त्यसैगरी बिहान ९ बजे नै दुई ओटा महत्वपूर्ण समितिहरूको बैठक सुरु हुँदैछ। जसअन्तर्गत शिक्षा, स्वास्थ्य तथा सूचना प्रविधि समितिको बैठकमा 'राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१' माथि दफावार छलफल हुनेछ। सोही समयमा बस्ने सार्वजनिक लेखा समितिको बैठकमा समितिको आन्तरिक कार्यविधि पारित गर्ने र आर्थिक बेरुजुका विषयमा विस्तृत अध्ययन गर्नका लागि 'बेरुजु छलफल उपसमिति' गठन गर्ने सम्बन्धमा आवश्यक निर्णय गरिनेछ।
यस्तै दिउँसो २ बजे महिला तथा सामाजिक मामिला समितिको बैठक बस्नेछ। उक्त बैठकमा राष्ट्रिय महिला आयोगको समग्र कामकारबाही, संस्थागत प्रगति तथा भावी योजनाका सम्बन्धमा आयोगका पदाधिकारीहरूसँग प्रत्यक्ष छलफल र समीक्षा गरिने कार्यसूची रहेको संसद् सचिवालयले जनाएको छ।
