बर्डफ्लु देखिएपछि सदर चिडियाखाना अनिश्चितकालका लागि बन्द [तस्बिररू]
बर्डफ्लुका कारण काग र परेवा मरेको पाइयो, चिडियाखाना आगन्तुकका लागि कम्तीमा दुई सातासम्म
हाम्रा कुरा
प्रकाशित २०८३ असार ५ शुक्रबार
205
Shares
तस्बिर – नेपाल फोटो लाइब्रेरी ।
ललितपुर । ललितपुरको जावलाखेलस्थित सदर चिडियाखाना परिसरभित्र रहेका जीवजन्तुहरूमा बर्डफ्लु संक्रमण देखिएको छ ।
बर्डफ्लु देखिएपछि चिडियाखाना भ्रमणमा रोक लगाइएको छ । राष्ट्रिय प्रकृति संरक्षण कोषले असार ५ गतेदेखि अर्को सूचना प्रकाशित नभएसम्म चिडियाखाना बन्द गरेको जनाएको छ ।
मुलुकका विभिन्न भागमा बर्डफ्लु फैलिरहँदा चिडियाखानामा पनि पुगेको हो ।
कोषकी प्रवक्ता रचना शाहले चिडियाखानाभित्र काग र परेवा मरेको अवस्थामा फेला परेपछि गरिएको परीक्षणमा बर्डफ्लुको सङ्क्रमण देखिएको बताइन् ।
“चिडियाखानामा बर्डफ्लुका कारण काग र परेवा मरेको पाइयो । पशु चिकित्सक तथा सम्बन्धित विज्ञसँग परामर्श गरिरहेका छौँ”, उनले भनिन्, “अन्य वन्यजन्तुलाई कसरी सुरक्षित राख्ने भन्ने विषयमा आवश्यक उपाय अवलम्बन गरिएको छ ।”
प्रवक्ता शाहका अनुसार तत्कालका लागि चिडियाखाना आगन्तुकका लागि बन्द गरिएको छ । कम्तीमा दुई सातासम्म बन्द रहने र त्यसपछिको अवस्था विज्ञहरूको सुझाव तथा जोखिम मूल्याङ्कनका आधारमा तय गरिने उनले बताइन् ।
चिडियाखानाभित्र रहेका अन्य जीवजन्तुको स्वास्थ्य अवस्था निगरानी बढाइएको तथा सम्भावित सङ्क्रमण नियन्त्रणका लागि आवश्यक सतर्कता अपनाइएको कोषले जनाएको छ ।
