आचारसंहिताभित्र रहेर निर्वाचन प्रक्रियामा सहभागी हुन रास्वपाको निर्देशन [भिडियो]
लेवी नतिरे प्रवेशमा रोक लगाइने, चार करोड रुपैयाँ खर्च लाग्ने अनुमान
हाम्रा कुरा
प्रकाशित २०८३ असार ४ बिहिबार
224
Shares
काठमाडौँ । राष्ट्रिय स्वतन्त्र पार्टी (रास्वपा)ले पार्टीको महाधिवेशनका क्रममा निर्वाचन आचारसंहिताभित्र रहेर निर्वाचन प्रक्रियामा सहभागी हुन निर्देशन दिने निर्णय गरेको छ।
बिहीबार पार्टी कार्यालय बनस्थलीमा बसेको रास्वपा सचिवालय बैठकले महाधिवेशन अगावै विभिन्न पदमा दाबी गर्ने र आवश्यकता भन्दा बढी प्रचारप्रसार देखिएकाले आचारसंहिताभित्र रहेर निर्वाचन प्रक्रियामा सहभागी हुन निर्देशन दिने निर्णय गरेको महामन्त्री कबिन्द्र बुर्लाकोटीले जानकारी दिए।
उनले भने,‘अनुशासनमा रहने र पार्टीको निर्वाचन आचारसंहिताभित्र पनि रहनेगरी निर्देशन गरिएको छ। पार्टीको महाधिवेशन अगावै आवश्यकता भन्दा बढी प्रचारप्रसार भएको होकि भन्ने पनि आएको थियो। त्यसो नगरी पार्टीलाई सौहार्दपूर्ण रूपमा एकढिक्का राख्नको लागि सबैको योगदान महत्वपूर्ण हुने भएकाले निर्वाचन आचारसंहिताभित्र रहेर सबै सदस्यलाई प्रस्तुत हुन अनुरोध गर्ने निर्णय भएको छ ।’
उनले विद्युतीय भोटिङ मेशिनको प्रयोगमार्फत महाधिवेशनको निर्वाचन तालिका सम्पन्न गर्ने गरी काम शुरू गरेको जानकारी दिए।
त्यस्तै उनका अनुसार अहिलेसम्मको प्रस्तावमा पार्टीको केन्द्रीय समिति १५१ र प्रदेश समितिका सभापतिहरू पदेन रहने छलफल अघि बढेको छ ।
बैठकले महाधिवेशनमा सहभागी हुने सबै प्रतिनिधिहरूले आफ्नो पुरानो पदअनुसारको लेवी तिरेको हुनुपर्ने र लेवी नतिरेको भए प्रवेशमा रोक लगाउने निर्णय गरेको पनि उनले जानकारी दिए ।
‘अधिवेशनमा सहभागी हुने सबै प्रतिनिधिहरूले आफ्नो पुरानो पद अनुसारको लेवी तिरेको हुनुपर्ने लेवी नतिरे प्रवेशमा रोक लगाउने छ त्यसैले लेवी तिर्नका लागिआजको बैठकबाट अनुरोध गरेको छ,’ उनले भने ।
महाधिवेशनका लागि करिब चार करोड रुपैयाँ खर्च लाग्ने अनुमान गरेको छ। पार्टीका अनुसार महाधिवेशनको खर्च प्रतिनिधिहरूको दर्ता शुल्क, सदस्य तथा शुभेच्छुकहरूको सहयोगबाट जुटाइने योजना छ।
साथै विभिन्न सेवा प्रदायक संस्थाहरूसँग सहुलियत वा लागत मूल्यमा सेवा उपलब्ध गराउने विषयमा छलफल भइरहेको पनि बताइएको छ। केही सेवा प्रदायकहरूले नाफा नलिई सेवा दिन प्रस्तावसमेत गरेको पार्टीको दाबी छ।
