संसद्को गतिरोध अन्त्य गर्न सिंहदरबारमा सर्वदलीय बैठक
हाम्रा कुरा
प्रकाशित २०८३ जेठ २५ सोमबार
463
Shares
काठमाडौँ । संसद्मा लामो समयदेखि जारी गतिरोध अन्त्य गर्ने र समसामयिक राजनीतिक विषयमा साझा धारणा बनाउने उद्देश्यका साथ सत्तारुढ राष्ट्रिय स्वतन्त्र पार्टी (रास्वपा) ले आह्वान गरेको सर्वदलीय बैठक सिंहदरबारमा जारी छ।
सिंहदरबारस्थित संसद् सचिवालयको हलमा जारी यस बैठकमा प्रमुख राजनीतिक दलका शीर्ष नेता तथा पदाधिकारीहरूको उपस्थिति रहेको छ। बैठकमा रास्वपाका सभापति रवि लामिछाने, नेपाली काङ्ग्रेसका संसदीय दलका नेता भीष्मराज आङदेम्बे, नेकपा (एमाले) का मुख्य सचेतक ऐनबहादुर महर, नेपाली कम्युनिस्ट पार्टीका सहसंयोजक माधवकुमार नेपाल र राष्ट्रिय प्रजातन्त्र पार्टी (राप्रपा) का अध्यक्ष राजेन्द्रप्रसाद लिङदेन लगायतका नेताहरू सहभागी छन्।
बैठकमा मुख्यगरी प्रधानमन्त्रीको हालैको कूटनीतिक अभिव्यक्तिका कारण संसद्मा पैदा भएको अवरोध हटाउने विकल्पहरू र मुलुकको पछिल्लो राजनीतिक घटनाक्रमबारे केन्द्रित रहेर सघन छलफल भइरहेको छ। आजै बिहान ११:०० बजे बस्ने प्रतिनिधि सभाको बैठकलाई सुचारु गर्न र दलहरूबीच मध्यमार्गी सहमति जुटाउने प्रयासस्वरूप रास्वपाले यो सर्वदलीय संवादको पहल गरेको हो।
