'द ट्वेन्टी सेकेन्ड ह्विलचेयर अफ लभ' कार्यक्रम सम्पन्न [फोटोफिचर]
हाम्रा कुरा
प्रकाशित २०८३ जेठ १३ बुधबार
785
Shares
काठमाडौँ । अपांगता भएका व्यक्तिहरूको सहज जीवनयापन, आत्मनिर्भरता तथा सामाजिक सहभागिता अभिवृद्धि गर्ने उद्देश्यले राष्ट्रिय अपांग कोषको आयोजनामा काठमाडौँमा “द ट्वेन्टी सेकेन्ड ह्विलचेयर अफ लभ” कार्यक्रम भव्य रूपमा सम्पन्न भएको छ । कार्यक्रममा गणतन्त्र कोरियास्थित विभिन्न सामाजिक संस्थाहरूको सहयोगमा ६५ वटा ह्विलचेयर वितरण गरिएको हो।
कार्यक्रममा कोरियाको उम हङ गिल ह्युमन फाउन्डेसन तथा टिनि शेयर अफ फिल्ड एक्टिभिटिले सहकार्य गरेका थिए । उक्त सहयोगमार्फत शारीरिक रूपमा अशक्त तथा हिँडडुलमा कठिनाइ भएका व्यक्तिहरूलाई आवश्यक ह्विलचेयर उपलब्ध गराइएको आयोजकले जनाएको छ।
कार्यक्रमका प्रमुख अतिथि नेपालका लागि गणतन्त्र कोरियाका राजदूत पार्क थेयङले अपांगता भएका व्यक्तिहरूलाई सहयोग गर्नु मानवीय जिम्मेवारी मात्र नभई समावेशी समाज निर्माणको आधार भएको बताए । उनले नेपाल र कोरियाबीचको मित्रवत सम्बन्ध केवल कूटनीतिक तहमा सीमित नरही सामाजिक तथा मानवीय क्षेत्रमा समेत विस्तार हुँदै गएको उल्लेख गरे ।
राजदूत थेयङले यस्ता सहयोगात्मक कार्यक्रमहरूले अपांगता भएका व्यक्तिहरूको दैनिक जीवन सहज बनाउनुका साथै उनीहरूमा आत्मविश्वास वृद्धि गर्ने विश्वास व्यक्त गरे । उनले आगामी दिनमा पनि शिक्षा, स्वास्थ्य, सामाजिक सुरक्षा तथा पुनःस्थापना जस्ता क्षेत्रमा नेपालसँग सहकार्य जारी रहने बताए ।
कार्यक्रमको समापन समाज कल्याण परिषद्का सदस्य सचिव तथा महिला, बालबालिका, लैंगिक तथा यौनिक अल्पसंख्यक र सामाजिक सुरक्षा मन्त्रालयका सहसचिव चक्रबहादुर बूढाले गरेका थिए । उनले अपांगता भएका नागरिकहरूको अधिकार सुनिश्चित गर्न राज्य, निजी क्षेत्र तथा अन्तर्राष्ट्रिय समुदायबीच सहकार्य आवश्यक रहेको धारणा राखे।
उनले सरकारले अपांगता भएका व्यक्तिहरूको पहुँच, समान अवसर र सामाजिक सहभागिता अभिवृद्धिका लागि विभिन्न नीति तथा कार्यक्रम सञ्चालन गरिरहेको जानकारी दिए । साथै यस्ता सहयोगात्मक कार्यक्रमहरूले सरकारको प्रयासलाई थप प्रभावकारी बनाउने उल्लेख गरे ।
कार्यक्रममा अपांगता अधिकारकर्मी, विभिन्न संघ–संस्थाका प्रतिनिधि, समाजसेवी, स्थानीय समुदाय तथा ह्विलचेयर प्राप्त गर्ने लाभग्राहीहरूको उल्लेखनीय उपस्थिति रहेको थियो। कार्यक्रममा सहभागी धेरै लाभग्राहीहरूले ह्विलचेयर प्राप्त गरेपछि आफ्नो दैनिक जीवनमा सहजता आउने बताएका थिए।
आयोजक राष्ट्रिय अपांग कोषले ह्विलचेयर वितरण मात्र नभई अपांगता भएका व्यक्तिहरूको पुनःस्थापना, क्षमता अभिवृद्धि तथा सामाजिक समावेशीकरणका क्षेत्रमा निरन्तर काम गर्दै आएको जनाएको छ । कोषका प्रतिनिधिहरूले आवश्यकता भएका नागरिकसम्म यस्ता सहयोग पुर्याउने अभियान आगामी दिनमा पनि जारी रहने बताएका छन् ।
वितरण गरिएका ह्विलचेयरले विद्यालय जान, रोजगारीमा सहभागी हुन, स्वास्थ्य सेवा लिन तथा दैनिक गतिविधिमा सक्रिय हुन कठिनाइ भोगिरहेका व्यक्तिहरूलाई ठूलो राहत पुग्ने अपेक्षा गरिएको छ।
कार्यक्रममा सहभागीहरूले यस्ता मानवीय तथा सामाजिक उत्तरदायित्वका कार्यक्रमहरूलाई निरन्तरता दिनुपर्नेमा जोड दिएका थिए।
