काठमाडौँ । दक्षिण कोरियाको सोलस्थित एक पुनरावेदन अदालतले पूर्वराष्ट्रपति युन सुक योलकी पत्नी किम केओन–हीलाई भ्रष्टाचार र शेयर बजार घोटालाको अभियोगमा चार वर्षको जेल सजाय सुनाएको छ। मंगलवार (२८ अप्रिल २०२६) सार्वजनिक गरिएको अदालती फैसलाअनुसार यसअघिको २० महिनाको सजायलाई बढाएर चार वर्ष पुर्याइएको हो।
पुनरावेदन अदालतले किमलाई 'ड्युच मोटर्स' को शेयर मूल्यमा चलखेल गरेको अभियोगमा पनि दोषी ठहर गरेको छ, जसमा तल्लो अदालतले उनलाई सफाइ दिएको थियो। यसका साथै विलासी उपहारहरू (च्यानल ह्यान्डब्याग र बहुमूल्य हिराको हार) घुसका रूपमा लिएको अभियोगलाई पनि अदालतले सदर गरेको छ। न्यायाधीशले फैसला सुनाउँदै किमले प्रथम महिलाको रूपमा आफ्नो प्रभावको दुरुपयोग गरेको र सरकारी पारदर्शितामाथिको जनविश्वासलाई आघात पुर्याएको टिप्पणी गरे।
अदालतले जेल सजायका साथै ५ करोड वोन (करिब ३४ हजार अमेरिकी डलर) जरिवाना समेत तोकेको छ। किमका पति तथा पूर्वराष्ट्रपति युन सुक योल पनि गत वर्ष डिसेम्बरमा संकटकाल लगाएको र अन्य भ्रष्टाचारका मुद्दामा दोषी ठहर भई कारावासको सजाय भोगिरहेका छन्। किमका वकिलहरूले भने यो फैसलाप्रति असहमति जनाउँदै सर्वोच्च अदालतमा पुनरावेदन गर्ने बताएका छन्।
