वैकल्पिक व्यवस्थाबिना राष्ट्रिय बाल अधिकार परिषद् खारेज नगरौँ : सांसद राना [भिडियो]
हाम्रा कुरा
प्रकाशित २०८३ जेठ ७ बिहिबार
384
Shares
काठमाडौँ। राष्ट्रिय स्वतन्त्र पार्टी (रास्वपा) की सांसद इन्दिरा राना मगरले राष्ट्रिय बाल अधिकार परिषद् खारेज गर्ने विषयमा सरकारको गम्भीर ध्यानाकर्षण गराएकी छन् ।
बिहीबार बसेको प्रतिनिधिसभा बैठकमा बोल्दै उनले अघिल्लो सरकारले राष्ट्रिय बाल अधिकार परिषद् खारेज गर्ने निर्णय गरेको भन्ने विषय सार्वजनिक रूपमा सुनिँदै आएको बताइन् ।
सांसद राना मगरले बाल अधिकार संरक्षण, बालबालिकाको हकहित तथा संस्थागत निरन्तरताजस्ता संवेदनशील विषयलाई ध्यानमा राख्दै स्पष्ट वैकल्पिक संरचना र प्रभावकारी व्यवस्था सुनिश्चित नभएसम्म उक्त निर्णय कार्यान्वयन नगर्न सरकारसँग आग्रह गरिन् ।
उनले भनिन्, ‘राष्ट्रिय बाल अधिकार परिषद् खारेज गर्ने सम्बन्धमा अघिल्लो सरकारले निर्णय गरेको भन्ने विषय सार्वजनिक रूपमा सुनिँदै आएको छ। बाल अधिकार संरक्षण, बालबालिकाको हकहित तथा संस्थागत निरन्तरता जस्ता संवेदनशील विषयलाई मध्यनजर गर्दै कुनै पनि स्पष्ट वैकल्पिक संरचना तथा प्रभावकारी व्यवस्था सुनिश्चित नभएसम्म उक्त निर्णय तत्काल कार्यान्वयन नगर्न नेपाल सरकारको गम्भीर ध्यानाकर्षण गराउन चाहन्छु ।’
उनले यस विषयमा सरोकारवालासँग व्यापक परामर्श गरी निर्णय पुनर्विचार गर्न पनि सरकारसमक्ष आग्रह गरिन् ।
सांसद राना मगरले बालबालिकालाई समाजको सबैभन्दा कमजोर र आवाजविहीन वर्गको रूपमा उल्लेख गर्दै उनीहरूको अधिकार, सुरक्षा र संरक्षणप्रति राज्य संवेदनशील हुनुपर्ने धारणा राखिन् ।
