पशुपति क्षेत्रमा पार्किङ र यी रुट प्रयोग गर्ने, यस्तो छ विशेष ट्राफिक योजना
शिवरात्रिको ट्राफिक सुरक्षा कवच
हाम्रा कुरा
प्रकाशित २०८२ फागुन २ शनिबार
655
Shares
काठमाडौँ । महाशिवरात्रि पर्वका अवसरमा पशुपतिनाथ क्षेत्रमा हुन सक्ने भक्तजनको अत्यधिक घुइँचोलाई व्यवस्थापन गर्न काठमाडौँ उपत्यका ट्राफिक प्रहरी कार्यालयले विशेष ट्राफिक योजना लागू गरेको छ।
उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेशराज सुवेदीका अनुसार दर्शनार्थीलाई सहज रूपमा आवतजावत र दर्शन गर्ने वातावरण मिलाउन ट्राफिक प्रहरीले सुरक्षा योजना तयार पारेको हो।
उनले सिफल चौरमा दर्शनार्थी, पासवाहक र सुरक्षाकर्मीका सवारीसाधनका लागि पार्किङ मिलाएका छन् भने गुहेश्वरी पारि तीर्थयात्री र दर्शनार्थीका गाडी राख्न सकिनेछ। त्यस्तै, तिलगङ्गा आँखा अस्पताल र करिडोर क्षेत्रमा पर्यटक तथा भक्तजनका सवारीसाधन पार्किङ गर्ने व्यवस्था उनले मिलाएका छन्।
वनकाली क्षेत्रमा भने शिविर सञ्चालन गर्ने संस्था, दमकल, एम्बुलेन्स र सुरक्षाकर्मीका सवारीसाधन मात्र रहनेछन् भने गौशाला प्रहरी वृत्तमा सरकारी र पासवाहक सवारीसाधन पार्किङ हुनेछ।
प्रवक्ता सुवेदीले उपत्यका बाहिरबाट आउने भक्तजनका लागि पनि निर्बाध आवागमनको व्यवस्था मिलाएका छन्। यदि गौशाला क्षेत्रमा भीडभाड धेरै भई सवारी चलाउन नसक्ने अवस्था आएमा मात्र वैकल्पिक मार्गको प्रयोग गरिनेछ। यसका लागि करिडोर र भित्री सडकहरूमा बाक्लो मात्रामा ट्राफिक प्रहरी परिचालन गरिएको छ।
चाबहिल, गौशाला र तिलगङ्गा क्षेत्रमा सवारीसाधन चलाउन दिने प्रयास गरिए पनि चाप बढेमा तुरुन्तै डाइभर्सन गरिने उनले बताएका छन्।
तीनकुनेबाट सिनामङ्गलतर्फ, बौद्धबाट गौरीघाटतर्फ र पुरानो बानेश्वरबाट गौशालातर्फ आउने मालवाहक सवारीसाधनलाई आवश्यकता अनुसार निषेध गरिएको छ। यदि गौशाला चोक ठप्प भएमा चाबहिल, पुरानो बानेश्वर र रातोपुल क्षेत्रबाट आउने सवारीसाधनलाई वैकल्पिक बाटोतर्फ पठाइनेछ।
भक्तजनको सुविधाका लागि वाग्मती करिडोर र जोरपाटीबाट आउने गाडीहरूलाई गुहेश्वरी पारिको पार्किङस्थल प्रयोग गर्न प्रहरीले अनुरोध गरेको छ। समग्रमा, पशुपति दर्शनलाई सुरक्षित र मर्यादित बनाउन ट्राफिक प्रहरीले निकै मिहिनेतका साथ यो योजना कार्यान्वयनमा ल्याएको छ।
