काठमाडौँ। युक्रेनका राष्ट्रपति भोलोदिमिर जेलेन्स्कीले आगामी फेब्रुअरी २४ मा राष्ट्रपतीय निर्वाचन र शान्ति सम्झौताका लागि जनमत सङ्ग्रह गराउने भनिएको योजनालाई पूर्ण रूपमा अस्वीकार गरेका छन्।
पत्रकारहरूसँग कुरा गर्दै उनले युक्रेनले आफ्नो मुलुकको सुरक्षा सुनिश्चितता र रुससँग ठोस युद्धविराम गरेपछि मात्र निर्वाचनको प्रक्रिया अघि बढाउने स्पष्ट पारेका छन्।
रुसी राष्ट्रपति भ्लादिमिर पुटिनसँगको सम्भावित वार्ताका बारेमा चर्चा गर्दै उनले युक्रेन रुस र बेलारुस बाहेकका तटस्थ स्थानहरू जस्तै अमेरिका वा युरोपमा वार्ताका लागि सधैँ खुला रहेको बताए।
जेलेन्स्कीले अमेरिकी पक्षले युक्रेनलाई निर्वाचनको समय तालिकाका लागि दबाब त दिइरहेको तर आवश्यक सुरक्षा सुनिश्चितता भने गर्न नसकेको गुनासो गरेका छन्।
फाइनान्सियल टाइम्सको एउटा रिपोर्टमा जेलेन्स्कीले द्वन्द्व सुरु भएको चौथो वर्षमा चुनाव र जनमत सङ्ग्रहको घोषणा गर्न चाहेको उल्लेख भएपछि उनको यो खण्डन आएको हो।
उक्त रिपोर्टमा ट्रम्प प्रशासनले युक्रेनलाई मे १५ सम्ममा जनमत सङ्ग्रह गर्न दबाब दिएको र त्यसो नगरे प्रस्तावित अमेरिकी सुरक्षा ग्यारेन्टी नै जोखिममा पर्न सक्ने चेतावनी दिएको दाबी गरिएको छ।
तर, जेलेन्स्कीले भने "पहिले सुरक्षा, अनि मात्र राजनीति" को अडानलाई प्राथमिकता दिएका छन्।
