राष्ट्रिय ग्रिडमा पाँच जलविद्युत् आयोजना जोड्न सम्झौता: नेपालको ऊर्जा लक्ष्य हासिलमा थप टेवा पुग्ने
हाम्रा कुरा
प्रकाशित २०८२ असार १८ बुधबार
1.3k
Shares
काठमाडौँ। नेपालको ऊर्जा क्षेत्रको विकासमा महत्त्वपूर्ण कदम चाल्दै राष्ट्रिय प्रसारण ग्रिड कम्पनी लिमिटेडले पाँचवटा जलविद्युत् प्रवर्द्धक कम्पनीसँग ग्रिड कनेक्सन सम्झौतामा हस्ताक्षर गरेको छ। ऊर्जा, जलस्रोत तथा सिँचाइमन्त्री दीपक खड्काको प्रमुख आतिथ्यमा मंगलबार यो सम्झौता सम्पन्न भएको हो।
मन्त्री खड्काले ऊर्जा क्षेत्रको उचित प्रवर्द्धन र लगानी व्यवस्थापनको अभावले नेपालको समृद्धिको मार्गमा अवरोध पुगेको स्वीकार गर्दै यस्ता सम्झौताले ऊर्जा क्षेत्रमा आवश्यक सुधार ल्याउन मद्दत पुग्ने बताए। उनले यो सम्झौताले नेपालले ऊर्जा विकासमा लिएको लक्ष्य हासिल गर्न महत्त्वपूर्ण योगदान पुर्याउने विश्वास व्यक्त गरे।
ऊर्जासचिव सुरेश आचार्य र विद्युत् नियमन आयोगका अध्यक्ष डा. रामप्रसाद धिताललगायत अधिकारीहरूले सरकारले सन् २०३५ सम्म राखेको ऊर्जा विकासको लक्ष्य पूरा गर्न यी सम्झौताहरूले सहयोग पुग्ने धारणा राखेका छन्।
लिमिटेडका प्रमुख कार्यकारी अधिकृत इञ्जिनियर सागर श्रेष्ठ र पाँच जलविद्युत् कम्पनीका प्रतिनिधिहरूले हस्ताक्षर गरेको यस सम्झौतामा निम्न आयोजनाहरू सामेल छन्:
एससी पावर कम्पनी प्रालि द्वारा प्रवर्द्धन गरिएको तिला–१ जलविद्युत् आयोजना (४४० मेगावाट, कालीकोट)।
सुर्मा सरोबर हाइड्रोपावर प्रालि द्वारा प्रवर्द्धन गरिएको महाकाली सेती अर्धजलाशययुक्त जलविद्युत् आयोजना (५४ मेगावाट, बझाङ)।
माता मालिका इनर्जी मल्टिपल प्रालि द्वारा प्रवर्द्धन गरिएको मालुमेला सेतीनदी पिकिङ हाइड्रोपावर आयोजना (७२ मेगावाट, बझाङ)।
सूर्य होल्डिङ प्राइभेट लिमिटेड द्वारा प्रवर्द्धन गरिएको अपर मेवा खोला ‘ए’ हाइड्रोपावर आयोजना (३१.९२ मेगावाट, ताप्लेजुङ)।
हिमजल हाइड्रोपावर प्रालि द्वारा प्रवर्द्धन गरिएको सुपर दरौदी हाइड्रोपावर प्रोजेक्ट (९.१४३ मेगावाट, गोरखा)।
