काठमाडौँ । इन्डियन प्रिमियर लिग (आईपीएल) २०२५ को समूह चरणका ६३ खेल सकिएसँगै प्लेअफमा पुग्ने चारवटै टोलीको टुङ्गो लागेको छ। बुधबार राति भएको खेलमा मुम्बई इन्डियन्सले दिल्ली क्यापिटल्सलाई ५९ रनले पराजित गर्दै प्लेअफमा आफ्नो स्थान सुरक्षित गरेको हो। यो हारसँगै दिल्ली यस सिजनबाट बाहिरिने छैटौँ तथा अन्तिम टोली बनेको छ। मुम्बई प्लेअफमा स्थान बनाउने चौथो टोली हो। यसअघि नै गुजरात टाइटन्स, रोयल च्यालेन्जर्स बेङ्ग्लोर र पन्जाब किङ्ग्स प्लेअफमा पुगिसकेका छन्।

वानखेडे स्टेडियममा १८१ रनको लक्ष्य पछ्याएको दिल्लीको टोली १८.२ ओभरमा १२१ रनमै अलआउट भयो। दिल्लीका लागि समीर रिजवीले सर्वाधिक ३९ रन बनाए। मुम्बईका लागि जसप्रित बुमराह र मिचेल स्यान्टनरले उत्कृष्ट प्रदर्शन गर्दै समान ३-३ विकेट लिए।

यसअघि, टस हारेर पहिले ब्याटिङ गरेको मुम्बईले ५ विकेट गुमाएर १८० रन बनाएको थियो। मुम्बईका लागि सूर्यकुमार यादवले ७३ रनको योगदान दिए। उनले नमन धीरसँग मिलेर अन्तिम १२ बलमा ४८ रन जोडे। नमनले ८ बलमा अविजित २४ रन बनाएका थिए। दिल्लीका लागि मुकेश कुमारले २ विकेट लिए।

आईपीएलमा आज गुजरात टाइटन्स (जीटी) ले लखनऊ सुपर जायन्ट्स (एलएसजी) सँग खेल्दैछ। १२ खेलमा ९ जित र ३ हारसहित १८ अङ्कका साथ गुजरात अहिले शीर्ष स्थानमा छ। आजको खेल जितेमा टोली २० अङ्कका साथ शीर्ष स्थानमा आफ्नो पकड थप बलियो बनाउनेछ। गुजरातलाई नम्बर-१ मा रहिरहन चेन्नाई सुपर किङ्ग्सविरुद्धको अन्तिम खेल पनि जित्नुपर्ने हुन्छ।

यता, लखनऊ सुपर जायन्ट्स यसअघि नै प्लेअफको दौडबाट बाहिरिसकेको छ। १२ खेलमा ५ जितसहित १० अङ्क रहेको एलएसजीले आजको खेल जितेर प्लेअफमा त पुग्दैन, तर यसले गुजरातको नम्बर-१ मा रहने सम्भावनालाई भने केही कम गर्न सक्छ।

गुजरातका साई सुदर्शन १२ खेलमा ६१७ रनका साथ प्रतियोगिताका शीर्ष स्कोरर बनेका छन्। शुभमन गिल ६०१ रनसहित दोस्रो स्थानमा छन् भने बुधबार ७३ रन बनाएका मुम्बईका सूर्यकुमार यादव ५८३ रनका साथ तेस्रो नम्बरमा पुगेका छन्।

गुजरातकै तीव्र गतिका बलर प्रसिद्ध कृष्ण १२ खेलमा २१ विकेट लिँदै प्रतियोगिताका शीर्ष विकेट टेकर बनेका छन्। चेन्नाईका स्पिनर नुर अहमदको पनि २१ विकेट छ। मुम्बईका ट्रेन्ट बोल्ट १९ विकेटका साथ तेस्रो नम्बरमा छन्।

लखनऊका निकोलस पूरन १२ खेलमा ३५ छक्कासहित प्रतियोगिताका शीर्ष सिक्स हिटर बनेका छन्। मुम्बईका सूर्यकुमार यादव ३० छक्काका साथ दोस्रो र राजस्थानका यशस्वी जैसवाल २८ छक्काका साथ तेस्रो स्थानमा छन्।