एनसेल एनएसएलको उपाधि लगातार दोस्रो पटक ललितपुरलाई [फोटोफिचर]
फाइनलमा पोखरा थन्डर्स २–१ ले पराजित, विजेतालाई ८० लाख
हाम्रा कुरा
प्रकाशित २०८२ वैशाख १३ शनिबार
769
Shares
काठमाडौँ । एनसेल नेपाल सुपर लिग (एनएसएल) को तेस्रो संस्करणको उपाधि ललितपुर सिटी एफसीले जितेको छ । शनिबार बेलुकी सम्पन्न फाइनलमा पोखरा थन्डर्सलाई पराजित गर्दै ललितपुरले लगातार दोस्रो पटक उपाधि जितेको हो ।
दशरथ रंगशालामा भएको पटक पटक हात हालाहालको स्थितिमा पुगेको फाइनलमा ललितपुर २–१ ले विजयी भएको हो । ललितपुरको जितमा दुवै गोल विदेशी खेलाडीले गरे । ललितपुर गत संस्करणको पनि विजेता हो । गत संस्करणमा लतितपुरले धनगढी एफसीलाई ३–२ ले पराजित गरेको थियो । धनगढी भने लगातार दोस्रो फाइनल फाइनल पुगे पनि उपाधि विहीन भएको थियो ।
यसपालि दोस्रो क्वालिफायरबाट बाहिरियो । धनगढीलाई पहिलो क्वालिफायरमा ललितपुरले र दोस्रो क्वालिफायरमा पोखराले हराएको थियो । ललितपुर पहिलो पटक अपराजित रहँदै उपाधि जित्न सफल भयो ।
ललितपुरका लागि इजिकेल र पापा इबु केबले गोल गरे । इजिकेलले एक गोल असिस्ट गरेका थिए । ललितपुरलाई गत संस्करणको उपाधि दिलाउँदा पनि उनले दुई गोल गरेका थिए ।
पोखराका सुदील राईले सान्त्वना गोल गरे । इजिकेलले ४२ औँ, सुदीलले ६४ औं मिनेटमा र पापाले ७४ औ मिनेटमा गोल गरेका थिए ।
खेलको दोस्रो हाफमा दुवै टोलीबीच हात हालाहाल र धकेलाधकेल भएको थियो । उपाधिसँगै ललितपुरले ८० लाख तथा उपविजेता पोखराले ३० लाख जितेको छ ।
