प्रभसिमरन र श्रेयसको अर्धशतकमा पञ्जाबको लगातार दोस्रो जित, लखनऊ आठ विकेटले पराजित
हाम्रा कुरा
प्रकाशित २०८१ चैत २० बुधबार
503
Shares
काठमाडौँ । इन्डियन प्रिमियर लिग (आईपीएल) २०२५ अन्तर्गत पञ्जाब किंग्सले लखनऊ सुपर जायन्ट्सलाई ८ विकेटले पराजित गर्दै लगातार दोस्रो जित दर्ता गरेको छ।
लखनऊको इकाना स्टेडियममा भएको खेलमा पञ्जाबले १७२ रनको लक्ष्य १६.२ ओभरमा पूरा गर्यो। पञ्जाबको जितमा प्रभसिमरन सिंह र श्रेयस अय्यरले अर्धशतकीय पारी खेले भने अर्शदीप सिंहले तीन विकेट लिए।
प्रभसिमरन सिंहले ३४ बलमा ६९ रनको उत्कृष्ट पारी खेले, जसमा ९ चौका र ३ छक्का सामेल थिए। श्रेयस अय्यरले ३० बलमा नटआउट ५२ रन बनाए, जसमा ३ चौका र ४ छक्का सामेल थिए। नेहल वढेराले २५ बलमा ४३ रनको योगदान दिए।
लखनऊ सुपर जायन्ट्सले निर्धारित २० ओभरमा ७ विकेट गुमाएर १७१ रन बनाएको थियो। लखनऊका लागि निकोलस पुरनले ४४ रन र आयुष बडोनीले ४१ रनको योगदान दिए। अर्शदीप सिंहले अन्तिम ओभरमा दुई विकेट लिँदै लखनऊको स्कोरलाई १७१ रनमा सीमित पारे।
पञ्जाबका लागि दिग्वेश राठीले २ विकेट लिए। लकी फर्ग्युसन, ग्लेन म्याक्सवेल, मार्को यान्सन र युजवेन्द्र चहलले पनि एक-एक विकेट लिए।
यस जितसँगै पञ्जाब किंग्स अंक तालिकाको दोस्रो स्थानमा उक्लिएको छ भने लखनऊ सुपर जायन्ट्स छैटौं स्थानमा छ। पञ्जाबले दुई खेलमा चार अंक जोडेको छ भने लखनऊले तीन खेलमा दुई अंक जोडेको छ।
