सिन्धुली । सिन्धुलीमा श्रीमती हत्या आरोपमा श्रीमान पक्राउ परेका छन् । पक्राउ पर्नेमा दुधौली नगरपालिका वडा नं ८ कछुवाखाडीका २२ वर्षीय दिनेश सदा छन् ।
दुधौली नगरपालिका वडा नं ९ की १७ वर्षीया अनिशा सदाको हत्या भएको जिल्ला प्रहरी कार्यालय सिन्धुलीले जनाएको छ ।
दिनेशले आइतबार राति भान्सामा घाँटी थिचेर श्रीमतीको हत्या गरेको प्रहरी उपरीक्षक गोविन्दराज काफ्लेले जानकारी दिए ।
एसपी काफ्लेका अनुसार घटनाको प्रारम्भिक अनुसन्धानका क्रममा आपसी मनमुटावका कारण श्रीमतीको घाँटी थिचेर हत्या गरेको देखिएको र दिनेशले श्रीमतीको हत्या गरेको भनी स्वीकारेको छन् ।
श्रीमतीको हत्या गरेको आरोप लागेका दिनेशलाई इलाका प्रहरी कार्यालय डकाहाको नियन्त्रणमा राखेर अहिले अनुसन्धानको काम भइरहेको छ ।
घटनास्थलबाट मुचुल्का तयार गरी ‘पोष्टमार्टम’का लागि शव स्थानीय नगरअस्पताल सिर्थौलीमा लगिएको प्रहरीले जनाएको छ ।
करिब १० महिना अघि मात्र दुधौली नगरपालिका-९ लालपुरकी अनिशासँग दिनेशले प्रेम विवाह गरेका थिए ।
