काठमाडौँ । मध्यपूर्वमा युद्धको तनाव तीव्र रूपमा चर्किएसँगै अमेरिकाले साउदी अरेबियालाई ठूलो परिमाणमा हतियार सहयोग गर्ने निर्णय गरेको छ। खाडी क्षेत्रमा सुरक्षा चुनौती थप जटिल बन्दै गएपछि अमेरिकाले साउदीको हवाई सुरक्षा क्षमता सुदृढ बनाउने उद्देश्यले करिब एक अर्ब ९६ करोड अमेरिकी डलर बराबरको परिष्कृत हतियार बिक्री गर्न स्वीकृति दिएको हो।

अमेरिकी विदेश मन्त्रालयले यो हतियार बिक्रीले मध्यपूर्व क्षेत्रमा आफ्नो प्रमुख गैर–नाटो साझेदार साउदी अरेबियाको रक्षा प्रणालीलाई बलियो बनाउने दाबी गरेको छ। यस निर्णयलाई अमेरिकाले आफ्नो विदेश नीति तथा क्षेत्रीय राष्ट्रिय सुरक्षा रणनीतिको महत्वपूर्ण कदमका रूपमा समेत हेरेको छ।

यो सम्झौता यस्तो समयमा सार्वजनिक भएको छ, जतिबेला साउदी अरेबिया र यमनका इरान समर्थित हुथी विद्रोहीबीचको युद्ध उत्कर्षमा पुगेको छ। सोमबार मात्रै हुथी विद्रोहीहरूले दक्षिणी साउदी सहर आभाको विमानस्थललाई लक्षित गरी शक्तिशाली क्षेप्यास्त्र प्रहार गरेका थिए। इरानी सर्वोच्च नेताको अन्त्येष्टिमा सहभागी भई हुथी प्रतिनिधिमण्डल बोकेर फर्किरहेको विमानलाई यमन सरकारले मोड्न खोजेपछि आक्रोशित हुथीहरूले साउदीमाथि यो आक्रमण गरेका हुन्।

यसका साथै, मध्यपूर्वमा युद्धविराम भङ्ग भई नौसैनिक नाकाबन्दी पुनः लागू भएपछि अमेरिका आफैँले पनि इरानमाथि सैन्य दबाब थप तीव्र बनाउँदै लगेको छ। यही तनावपूर्ण पृष्ठभूमिमा साउदीलाई हतियार उपलब्ध गराउने अमेरिकी कदमले क्षेत्रीय युद्धको समीकरणमा ठूलो अर्थ राख्ने विज्ञहरू बताउँछन्।

नयाँ रक्षा प्याकेजअन्तर्गत साउदी अरेबियाले २० हजार थानसम्म उन्नत ‘एडभान्स्ड प्रिसिजन किल वेपन सिस्टम’ (एपीकेडब्लुएस) र त्यससँग सम्बन्धित घातक हतियारहरू प्राप्त गर्नेछ। अमेरिकी नौसेनाका अनुसार यो प्रणालीले नजिकको युद्धमा अतिरिक्त भौतिक क्षति कम गर्दै सत्रुको निश्चित लक्ष्यमाथि अचुक र प्रभावकारी आक्रमण गर्न सहयोग पुर्‍याउँछ।

न्युजर्सीस्थित बीएई सिस्टम्स प्रमुख ठेकेदार रहने यस सम्झौताले साउदीको वर्तमान तथा भविष्यका सैन्य चुनौती सामना गर्ने क्षमता बढाउने अमेरिकी विश्वास छ। यसका साथै मध्यपूर्वी आकाशमा अमेरिकी सेना, नाटो र अन्य क्षेत्रीय साझेदार सेनाबीचको अन्तरक्रियात्मक सैन्य क्षमता समेत सुदृढ हुने विदेश मन्त्रालयले स्पष्ट पारेको छ।