नर्वेसँग पराजित भएसँगै नेयमारले गरे संन्यासको घोषणा
हाम्रा कुरा
प्रकाशित २०८३ असार २२ सोमबार
679
Shares
काठमाडौँ । ब्राजिलियन फुटबलका स्टार फरवार्ड नेयमार जुनियरले अन्तर्राष्ट्रिय फुटबलबाट संन्यासको घोषणा गरेका छन्। जारी फिफा विश्वकप २०२६ को अन्तिम–१६ को खेलमा ब्राजिल नर्वेसँग २–१ गोल अन्तरले पराजित भई प्रतियोगिताबाट बाहिरिएलगत्तै उनले राष्ट्रिय टोलीबाट आफ्नो सुखद यात्राको अन्त्य गर्ने निर्णय लिएका हुन्।
अमेरिकाको न्युजर्सी रङ्गशालामा भएको उक्त तनावपूर्ण खेलमा नेयमारले ब्राजिलका लागि सान्त्वना गोल गरे। खेलको इन्जुरी समयमा पेनाल्टीमार्फत उनले गरेको सो गोल नै जारी विश्वकप प्रतियोगितामा उनको एक मात्र गोल बन्यो।
आफ्नो खेल जीवनमा चारवटा फिफा विश्वकप खेलेका ३४ वर्षीय नेयमार यसपटक भने पूर्ण रूपमा फिट थिएनन्। सोही कारण उनले जारी विश्वकपका खेलहरूमा अधिकांश समय मैदान बाहिरै बिताउनुपर्यो र केवल दुई खेलमा मात्रै वैकल्पिक खेलाडीका रूपमा मैदान प्रवेश गर्ने अवसर पाए।
नेयमार ब्राजिलियन राष्ट्रिय पुरुष फुटबल टोलीका लागि इतिहासमै सर्वाधिक गोल गर्ने कीर्तिमानी खेलाडी हुन्। सन् २०१० मा मात्र १८ वर्षको उमेरमा सिनियर टोलीबाट डेब्यु गरेका उनले १६ वर्ष लामो अन्तर्राष्ट्रिय फुटबल यात्राका क्रममा ब्राजिलका लागि १२९ खेल खेल्दै कुल ८० गोल गर्ने ऐतिहासिक सफलता प्राप्त गरे।
उनको संन्याससँगै ब्राजिलियन फुटबलको एक सुनौलो युगको अन्त्य भएको छ।
