पोखरा। कास्कीको मादी गाउँपालिकाले आगामी आर्थिक वर्षका लागि ६५ करोडभन्दा बढीको बजेट सार्वजनिक गरेको छ ।

मंगलबार सम्पन्न १९ औं गाउँसभामा उपाध्यक्ष कल्पना गुरुङकल्पना गुरुङले आर्थिक वर्ष २०८३/०८४ का लागि ६५ करोड १२ लाख ५१ हजार रुपैयाँ बराबरको बजेट प्रस्तुत गरेकी हुन् ।

बजेटमध्ये चालुतर्फ ४६ करोड ९७ लाख ६१ हजार र पुँजीगततर्फ १८ करोड १४ लाख रुपैयाँ विनियोजन गरिएको छ ।

खर्च व्यवस्थापनका लागि संघीय समानिकरण अनुदान १० करोड २६ लाख, संघीय सशर्त अनुदान २८ करोड २९ लाख र संघीय राजस्व बाँडफाँट ११ करोड ८२ लाख ९८ हजार रुपैयाँ प्राप्त हुने अनुमान गरिएको छ ।

त्यस्तै प्रदेश समानिकरण अनुदान १ करोड ११ लाख ९९ हजार, प्रदेश समपूरक अनुदान ४५ लाख, प्रदेश विशेष अनुदान ४० लाख र प्रदेश राजस्व बाँडफाँट एक करोड ११ लाख ९६ हजार प्राप्त हुने अनुमान गरिएको छ ।

स्थानीय राजस्व बाँडफाँट ५६ लाख, रोयल्टी दुई करोड ६० लाख र आन्तरिक आय एक करोड ११ लाख ९६ हजार हुने अपेक्षा गरिएको छ ।

तर गाउँपालिकाले छ करोड ३१ लाख २० हजार घाटा बजेट पनि प्रस्तुत गरेको छ, जसलाई चालु आर्थिक वर्षको मौज्दातबाट पूर्ति गरिने जनाएको छ ।

क्षेत्रगत विनियोजनअनुसार वडास्तरीय योजना तथा कार्यक्रमका लागि आठ करोड आठ लाख २४ हजार छुट्याइएको छ ।

स्वास्थ्य, शिक्षा र सामाजिक विकासतर्फ ३२ करोड ५४ लाख, पूर्वाधार तथा पर्यटनतर्फ १३ करोड ५४ लाख ४१ हजार, र कृषितर्फ तीन करोड २९ लाख ५३ हजार रुपैयाँ विनियोजन गरिएको छ ।

पहाडी र हिमाली भूगोल भएको मादीले ग्रामीण पहुँच सहज बनाउन विद्यालयमा बस खरिदका लागि अनुदान दिने नीति अघि सारेको छ ।

टाढा बस्ने विद्यार्थीको सुरक्षित आवागमन सुनिश्चित गर्न विद्यालय बस सञ्चालनमा सहयोग गर्ने र त्यसका लागि सुरक्षा मापदण्ड तथा नियमित अनुगमन लागू गरिने उपाध्यक्ष गुरुङले बताएकी छन् । साथै विद्यार्थीलाई बस भाडा उपलब्ध गराउने व्यवस्था पनि गरिनेछ ।

गाउँपालिकाले वित्तीय अनुशासन कडा बनाउँदै अबदेखि कुनै पनि कार्यक्रममा पेश्की नदिने नीति लिएको छ । बेरुजु शून्यमा झार्ने लक्ष्यसहित पेश्की खर्चलाई पूर्ण रूपमा नियन्त्रण गरिने उपाध्यक्ष गुरुङले स्पष्ट पारेकी छन् ।

निर्माण सामग्री खरिदबाहेक अन्य कार्यमा पेश्की नदिने नीति लागू गरिने र महालेखा प्रतिवेदनअनुसार देखिएको बेरुजु असुलउपर गर्दै सुधार गर्ने लक्ष्य लिइएको छ ।

कृषि क्षेत्रमा सामूहिक तथा सहकारी खेतीलाई प्रवर्द्धन गर्दै ‘एक गाउँ, एक उत्पादन’ अवधारणाको अध्ययन अघि बढाइने भएको छ । बाँझो तथा नदी-खोला किनाराका जमिनमा बगर खेती कार्यक्रम सञ्चालन गर्ने नीति पनि लिइएको छ ।

सीमित स्रोतका बीच कृषि, शिक्षा, पूर्वाधार र सामाजिक विकासलाई प्राथमिकतामा राख्दै मादी गाउँपालिकाले विकास कार्यक्रम अघि सारेको छ ।