काठमाडौँ । अमेरिकी राष्ट्रपति डोनाल्ड ट्रम्पले इरानसँग शान्ति सम्झौता स्थापना भएमा त्यहाँका सर्वोच्च नेता मोज्तबा खामेनीसँग भेटवार्ता गर्न आफू पूर्ण रूपमा खुला रहेको बताएका छन् । बिहीबार आयोजित एक विशेष कार्यक्रममा बोल्दै राष्ट्रपति ट्रम्पले दुई देशबीच कुनै ठोस र दीर्घकालीन सम्झौता भएमा मात्र यस्तो उच्चस्तरीय भेटवार्ता सम्भव रहेको स्पष्ट पारे ।
आफ्नो स्वभाविक शैलीमा टिप्पणी गर्दै ट्रम्पले भने, ‘म व्यक्तिगत रूपमा भेट्न त चाहन्नँ, तर यदि वार्ता र परिस्थितिले भेटको मोड लियो भने म त्यसलाई सम्मानका रूपमा लिनेछु । यदि हामीबीच कुनै ठोस सम्झौता भयो भने उनीसँग भेट हुने बलियो सम्भावना छ र म त्यसका लागि तयार छु ।’
आफू र इरानी सर्वोच्च नेताबीचको सम्बन्ध तथा बुझाइबारे टिप्पणी गर्दै ट्रम्पले खामेनीलाई एक ‘व्यावसायिक’ (प्रोफेसनल) व्यक्तिको संज्ञा दिए । उनीसँगको सम्बन्धबारे ट्रम्पले थपे, ‘म उनको प्रिय वा मन पर्ने पात्र नहुन सक्छु, तर उनी एक व्यावसायिक व्यक्ति हुन् र कतिपय क्षेत्रमा उनको निकै राम्रो प्रतिष्ठा पनि रहेको छ ।’
उक्त ऐतिहासिक भेटवार्ता अमेरिकाकै भूमिमा हुन सक्ने सम्भावनाका बारेमा सोधिएको प्रश्नमा ट्रम्पले यस विषयमा आफूले हालसम्म कुनै ठोस प्रस्ताव नगरेको तर केही राजनीतिक वृत्त र सल्लाहकारहरूले यस्तो सुझाव दिएको खुलासा गरे ।
यसैबीच अमेरिकी विदेशमन्त्री मार्को रुबियोले मंगलबार सिनेटको सुनुवाइका क्रममा इरानका नयाँ सर्वोच्च नेता जीवित रहेको र उनी अमेरिका–इरानबीच जारी कूटनीतिक वार्ताहरूमा पछिल्लो समय बढ्दो रूपमा संलग्न भइरहेको जानकारी दिएका छन् ।
विदेशमन्त्री रुबियोका अनुसार सर्वोच्च नेता खामेनीले हाल प्रत्यक्ष रूपमा बाहिर नदेखिए पनि लिखित रूपमा र विभिन्न मध्यस्थकर्ताहरूमार्फत अमेरिका सँगको संवादलाई अगाडि बढाइरहेका सकारात्मक संकेतहरू प्राप्त भएका छन् ।
