काठमाडौँ ।  बाढीपहिरोले बगाएका काभ्रेपलाञ्चोकका ६ वटा झोलुङ्गे पुलहरूको पुनर्निर्माण गरिने भएको छ। विशेषगरी जिल्लाको दक्षिणी क्षेत्रमा रोशी खोलाको बाढीपहिरोले बगाएका ती पुलहरूको निर्माणका लागि अर्थ मन्त्रालयबाट स्रोत (बजेट) सुनिश्चित भएको हो। विक्रम संवत २०८१ असोज १०–१२ गतेको अविरल वर्षासँगै रोशी खोलामा आएको विनाशकारी बाढीका कारण क्षति पुगेका पक्की तथा झोलुङ्गे पुलहरू झन्डै दुई वर्षपछि पुनर्निर्माण हुन लागेका हुन्। उक्त बाढीका कारण जिल्लाको नमोबुद्ध नगरपालिका, रोशी र तेमाल गाउँपालिका जोड्ने झोलुङ्गे पुलहरूमा ठुलो क्षति पुगेको थियो।

सहरी विकास मन्त्रालयअन्तर्गतको सस्पेन्सन ब्रिज डिभिजनका सूचना अधिकारी सिनियर डिभिजन इन्जिनियर प्रेमनारायण बस्यालका अनुसार रोशी गाउँपालिका–३ स्थित नमोबुद्ध रोशी (पिपलटार सुँगुरेडाँडा) झोलुङ्गे पुल, खाक्सी झोलुङ्गे पुल, रोशी गाउँपालिका–११ स्थित माम्ती पिप्ले (लोङसाङ–कालढुङ्गा) झोलुङ्गे पुल र पिप्लेदोभान झोलुङ्गे पुल पुनर्निर्माणका लागि अर्थ मन्त्रालयबाट स्रोत सुनिश्चित भएको छ। 

त्यस्तै बाढीले क्षतिग्रस्त रोशी–९ स्थित नार्के झोलुङ्गे पुल र रोशी–७ स्थित कटुञ्जेबेँसी–१ युएस झोलुङ्गे पुल पुनर्निर्माणका लागि ३ करोड रुपैयाँदेखि ५ करोड ५० लाख रुपैयाँसम्मको स्रोत सुनिश्चित गरिएको छ। यसका साथै वाग्मती नदीको बाढीले क्षति पुर्‍याएको काभ्रेपलाञ्चोकको खानीखोला गाउँपालिका र मकवानपुर जोड्ने फार्सा झोलुङ्गे पुल पुनर्निर्माणका लागि पनि बजेट सुनिश्चित भएको छ।

स्रोत सुनिश्चित भएका झोलुङ्गे पुल पुनर्निर्माणका लागि चालु आर्थिक वर्षमै ठेक्का आह्वान गरिने छ। यी योजनाहरू बहुवर्षीय भएकाले आगामी आर्थिक वर्षबाट पुल निर्माणको काम सुरु गरिने छ। पुल पुनर्निर्माणका क्रममा कहीँकतै जग्गा विवाद देखिएमा ती योजनालाई रोकेर अन्य योजनाको काम अघि बढाइने रणनीति डिभिजनको छ। पुनर्निर्माणको सम्पूर्ण काम डेढ वर्षदेखि दुई वर्षभित्र सम्पन्न गरिसक्ने लक्ष्य राखिएको छ।

विक्रम संवत २०८१ असोजको बाढीले तेमाल गाउँपालिका र मङ्गलटार जोड्ने रोशी खोलाको फलामे पुल समेत बगाएको थियो। आगामी वर्षायाममा बिपी राजमार्ग अवरुद्ध हुन सक्ने अवस्थालाई ध्यानमा राख्दै वैकल्पिक मार्गका रूपमा प्रयोग गर्न रोशी खोलाकै मङ्गलटार र काल्धार जोड्ने बेलीब्रिज जडान गर्न काभ्रेपलाञ्चोक प्रशासनले सडक विभागलाई अनुरोध गरेको छ। उक्त बाढीले बिपी राजमार्गको मात्रै करिब ३० किलोमिटर सडकसहित राजमार्गमा जोडिएका झोलुङ्गे पुललगायतका संरचनामा क्षति पुर्‍याएको थियो।

रोशी गाउँपालिकाका अध्यक्ष दिनेश लामाका अनुसार बाढीका कारण रोशी, तेमाल गाउँपालिका र नमोबुद्ध नगरपालिकाबिच आवतजावत गर्ने झोलुङ्गे पुलहरू पूर्ण रूपमा क्षति हुँदा स्थानीयले ठुलो सास्ती व्यहोर्नुपरेको छ। पुल बगाएपछि नागरिकहरूले बर्खाअघिसम्म खोलामा फड्के (काठको अस्थायी पुल) हालेर आवतजावत गर्ने गरेका थिए। तर हाल खोलामा पानीको बहाव बढेको समयमा उनीहरू एक घण्टा टाढा रहेको अर्को पक्की वा झोलुङ्गे पुल तर्न बाध्य छन्।