रातो मच्छिन्द्रनाथको रथ ठटीटोल पुर्याइयो, आज साँझ ‘नरिवल खसाल्ने जात्रा’
हाम्रा कुरा
प्रकाशित २०८३ वैशाख १६ बुधबार
316
Shares
काठमाडौँ । वर्षा र सहकालका देवता मानिने प्रसिद्ध रातो मच्छिन्द्रनाथको रथलाई आज ललितपुरको लगनखेलस्थित ठटीटोल पुर्याइएको छ। रथ यात्राको निर्धारित तालिकाअनुसार भक्तजन र जात्राका सहभागीहरूले उत्साहपूर्वक रथ तानेर ठटीटोल पुर्याएका हुन्।
रथ ठटीटोल आइपुगेसँगै आजै साँझ यहाँको विशेष आकर्षण मानिने ‘नरिवल खसाल्ने जात्रा’ सम्पन्न गरिनेछ। रथको माथिल्लो भाग (गजुरी नजिक) बाट नरिवल खसाल्ने यो परम्परा हेर्न र खसालिएको नरिवल समात्नका लागि ठटीटोलमा श्रद्धालुहरूको ठूलो भीड लाग्ने गर्दछ। प्रचलित जनविश्वासअनुसार यो नरिवल समात्न सक्ने व्यक्तिलाई शुभ फल प्राप्त हुने र सन्तान प्राप्ति हुने मानिन्छ।
आज साँझ नरिवल खसाल्ने विधि सकिएपछि जात्राको यो चरण विधिवत् रूपमा अगाडि बढ्नेछ। ललितपुरको सबैभन्दा लामो र सांस्कृतिक रूपमा महत्वपूर्ण मानिने यस जात्रालाई व्यवस्थित र सुरक्षित बनाउन स्थानीय प्रशासन तथा सरोकारवाला निकायहरूले विशेष सक्रियता देखाएका छन्।
