काठमाडौँ ।  मध्यपूर्वमा जारी अमेरिका–इजरायल र इरानबीचको युद्धका कारण विश्व ऊर्जा आपूर्तिमा अनिश्चितता बढिरहेका बेला रुसले चीनको सम्भावित ऊर्जा अभाव पूर्ति गर्न सक्ने स्पष्ट सङ्केत दिएको छ। विशेषगरी हर्मुज जलमार्गमध्यबाट हुने ढुवानीमा अवरोध आएपछि उत्पन्न परिस्थितिमा मस्कोले आफूलाई चीनका लागि भरपर्दो वैकल्पिक आपूर्तिकर्ताका रूपमा प्रस्तुत गरेको हो।

रुसी विदेशमन्त्री सर्गेइ लाभरोभले बेइजिङमा आयोजित पत्रकार सम्मेलनमा आफ्नो देश चीनसहित सहकार्य गर्न इच्छुक अन्य राष्ट्रहरूको ऊर्जा आवश्यकतामा देखिन सक्ने कमी पूर्ति गर्न सक्षम रहेको बताए। होर्मुज क्षेत्रको अवरोधका कारण ऊर्जा आपूर्ति प्रभावित हुने सम्भावनाबारे सोधिएको प्रश्नमा उनले रुससँग पर्याप्त प्राकृतिक स्रोत रहेको उल्लेख गरे।

यसै सन्दर्भमा उनले रुसी राष्ट्रपति भ्लादिमिर पुटिनले चालु वर्षको पहिलो ६ महिनाभित्र चीनको भ्रमण गर्ने तयारी गरिरहेको जानकारी दिए। मस्कोस्थित राज्य समाचार एजेन्सी तासका अनुसार यो भ्रमणले दुई देशबीचको रणनीतिक साझेदारीलाई अझ सुदृढ बनाउने अपेक्षा गरिएको छ। सन् २०२२ मा रुसले युक्रेनमाथि आक्रमण गरेपछि पश्चिमी प्रतिबन्धका कारण मस्को र बेइजिङबीचको आर्थिक तथा राजनीतिक सहकार्य उल्लेखनीय रूपमा गहिरिएको छ।

चीनको दुईदिने भ्रमणका क्रममा लाभरोभले राष्ट्रपति सी जिनपिङसँग भेटवार्ता गरे। उक्त भेटपछि उनले रुस–चीन सम्बन्धलाई ‘कुनै पनि चुनौतीको सामना गर्न सक्षम र स्थिर’ भएको उल्लेख गरे। साथै, यी सम्बन्धहरूले अन्तर्राष्ट्रिय मामिलामा स्थायित्व ल्याउने भूमिका खेलिरहेको र विश्वव्यापी रूपमा यसको महत्त्व बढ्दै गएको पनि उनले बताए।

उनका अनुसार विश्वका धेरै देशहरू अस्थिरता वा द्वन्द्वभन्दा शान्ति र सहकार्य चाहन्छन् र यस्तो सन्दर्भमा रुस–चीन सहकार्यले शक्ति सन्तुलन कायम गर्न मद्दत पुर्‍याइरहेको छ। लाभरोभको यो भ्रमण त्यस्तो समयमा भएको हो जतिबेला चिनियाँ राष्ट्रपति सीले एकै साताभित्र भियतनामका नेता टो लाम र स्पेनका प्रधानमन्त्री पेड्रो सान्चेज लगायतका उच्चस्तरीय नेताहरूसँग भेटघाट गरिरहेका छन्।