साइबर बुलिङको कानून निर्माण गर्न आवश्यक : उपाध्यक्ष भण्डारी [भिडियो]
हाम्रा कुरा
प्रकाशित २०८२ चैत २४ मंगलबार
682
Shares
काठमाडौँ । राष्ट्रिय सभाकी नवनियुक्त उपाध्यक्ष लीलाकुमारी भण्डारीले पदभार ग्रहण गरेकी छन् । मंगलबार राष्ट्रपति कार्यालय शीतल निवासमा आयोजित एक समारोहबीच अध्यक्ष नारायणप्रसाद दाहालबाट शपथग्रहण गरेलगत्तै उनले सिंहदरबार पुगेर पदभार ग्रहण गरेकी हुन् ।
पदभार ग्रहणपछि सञ्चारकर्मीसँको कुराकानी उनले साइबर बुलिङ सम्बन्धी छुट्टै कानुन निर्माण गर्न आवश्यक रहेको बताइन् ।
महिलालाई समाजमा बाच्नै नसक्ने गरी हतियारको रुपमा सामाजिक सञ्जालको नकारात्मक रुपमा प्रयोग भएको भन्दै उनले मर्यादीत समाज बनाउनका लागि पनि साइबर बुलिङ सम्बन्धी छुट्टै कानुन निर्माण गर्न आवश्यक रहेको बताइन् ।
उनले भनिन्, ‘समाजमा बाच्नै नसक्नेगरी अहिलेको अर्को हतियार नकारात्मक रुपमा महिलाहरुमाथि प्रयोग भएको छ। महिलाको जीवन सिध्याउन उसको चरित्रमाथि प्रश्न गरिदिए पुग्छ। यो साइबर बुलिङसम्बन्धी कानून नै बनाएर जुन अपराधिक क्रियाकलाप भइरहेको छ त्यसको लागि सरकाले चाँडै सोच्ने छ। मर्यादित समाज बनाउने हो भने यस सम्बन्धी कानून नै बनाउनुपर्छ जस्तो लाग्छ ।’
राष्ट्रिय सभाको काम कार्वाहीलाई सहजीकरण गर्ने, अध्यक्षलाई सहयोग गर्ने, सभालाई सशक्त र मर्यादित सभा बनाउन आफ्नो भूमिका रहने उनले जानकारी दिइन् ।
सभाको गरिमालाई मध्यनजर गरेर अनुशासितपूर्वक काम कार्वाही अघि बढाउने विशेष योगदान आफ्नो हुने उनले जानकारी दिइन् ।
‘राष्ट्रिय सभाको काम कार्वाहीलाई सहजीकरण गर्ने, अध्यक्षलाई सहयोग गर्ने, सभालाई सशक्त, मर्यादित सभाको आफ्नो कर्तव्यतिर सहयोग गर्न मेरो आफ्नो भूमिका हुनेछ। सभाको गरिमालाई मध्यनजर गरेर अनुशासितपूर्वक अध्यक्षपछि मैले काम कार्वाही अगाडि बढाउने विशेष योगदान हुने छ,’ उनले भनिन्।
