काठमाडौँ । अमेरिकी सेनाले पूर्वी प्रशान्त र क्यारिबियन क्षेत्रमा तीनवटा जहाजमाथि आक्रमण गर्दा ११ जनाको मृत्यु भएको छ। अमेरिकी दक्षिणी कमाण्डले सामाजिक सञ्जाल 'एक्स' मार्फत दिएको जानकारी अनुसार पूर्वी प्रशान्त क्षेत्रका दुईवटा जहाजमा आठ जना (प्रत्येकमा चार-चार जना) र क्यारिबियन क्षेत्रको तेस्रो जहाजमा तीन जनाको ज्यान गएको हो।
कमाण्डले ती जहाजहरू लागुऔषध तस्करीका लागि कुख्यात मार्गहरूबाट गइरहेको र तस्करीमा संलग्न रहेको दाबी गरेको छ। गुप्तचर निकायको सूचनाका आधारमा गरिएको यस कारबाहीमा अमेरिकी सेनालाई भने कुनै क्षति नभएको बताइएको छ। यद्यपि, अमेरिकी प्रशासनले ती डुङ्गा, कार्गो वा मारिएका व्यक्तिहरूका बारेमा लगाइएका आरोपहरू पुष्टि गर्ने कुनै ठोस प्रमाण भने हालसम्म उपलब्ध गराएको छैन।
सेप्टेम्बर महिनाको सुरुदेखि नै अमेरिकी सेनाले क्यारिबियन र पूर्वी प्रशान्त क्षेत्रमा लागुऔषध तस्करीको आरोपमा डुङ्गाहरूमाथि करिब ४० पटक आक्रमण गरिसकेको छ, जसमा हालसम्म १३० भन्दा बढी मानिसले ज्यान गुमाएका छन्। भेनेजुएलाका राष्ट्रपति निकोलस मादुरो र उनकी पत्नीलाई पक्राउ गरिएको जनवरी ३ को सैन्य कारबाहीपछि पेन्टागनले जनवरीको अन्त्यदेखि जहाजहरूमाथि पुनः आक्रमण सुरु गरेको हो।
