हाँडीगाउँको प्राचीनता फर्काउन ५४ घरको अग्रमोहडा सुधार गरिने
हाम्रा कुरा
प्रकाशित २०८२ पुष २६ शनिबार
548
Shares
काठमाडौँ। काठमाडौँ महानगरपालिकाले आधुनिक निर्माणका कारण हराउँदै गएको हाँडीगाउँको ऐतिहासिक र सांस्कृतिक पहिचान पुनःस्थापना गर्न ठूलो अभियान शुरू गरेको छ।
यसअन्तर्गत कृष्णमन्दिरदेखि डबली हुँदै भवँर कुःसम्म करिब तीन सय नौ मिटर सडक आसपासका ५४ ओटा घरको अग्रमोहडा मौलिक नेवार शैलीमा सुधार गरिनेछ। यसका लागि नौ करोड ४५ लाख रुपैयाँमा निर्माण सम्झौता भएको छ।
यस मार्गमा रहेका ६३ घरमध्ये नौ घरधनीले आफैँ अग्रमोहडा सुधार गरिसकेका छन् भने बाँकी घरमा वडा कार्यालय र महानगरपालिकाको समन्वयमा काम अघि बढाइनेछ।
परियोजनाअन्तर्गत परम्परागत झ्यालढोका, बालकोनी, पेटी, गारो, बलेँसी र झिँगटी छानाको प्रयोग गर्दै भवनको मौलिक स्वरूप फर्काइनेछ।
साथै, सडकमा ढुङ्गा छाप्ने, पाटीपौवा, मन्दिर, डबली र सामुदायिक संरचनाको पुनरुत्थान पनि गरिनेछ।
वडाध्यक्ष वीरेन्द्र प्रजापतीका अनुसार हाँडीगाउँ उपत्यकाकै प्राचीन बस्तीमध्ये एक हो, जहाँ पूर्व लिच्छवी र लिच्छवीकालीन सांस्कृतिक तथा पुरातात्विक अवशेष भेटिएका छन्।
‘हाँडीगाउँको प्राचीनता नरःदे हो, यसलाई जोगाउन गुरुयोजनाअनुसार चरणबद्ध रूपमा काम गरिरहेका छौँ,’ उनले बताए।
धार्मिक, सामाजिक तथा सांस्कृतिक जात्रा पर्वमा निरन्तर प्रयोग हुने यस मार्गको मौलिकता संरक्षणले स्थानीय पहिचानसँगै पर्यटन प्रवर्द्धनमा पनि योगदान पुग्ने अपेक्षा गरिएको छ।
