काठमाडौँ । नेकपा एमालेको ११औँ राष्ट्रिय महाधिवेशनमा मतदान समयमा हुन नसक्दा धेरैकुरा प्रभावित भएको छ । भृकुटीमण्डपको केन्द्रमा महाधिवेशन चलिरहँदा भृकुटीमण्डप क्षेत्र पूरै प्रभावित भएको छ ।
त्यतिमात्र होइन पुतलीसडक पद्मोदय मोडदेखि राष्ट्रिय सभागृहसम्मको पूरै सडकमा सवारी आवतजावत ठप्प छ । त्यतिमात्र होइन त्यो स्थानमा पर्ने बाल्मिकी, आरआर, नेपाल ल र विश्वभाषा क्याम्पसको पठनपाठन नै प्रभावित भएको छ ।
महाधिवेशन प्रतिनिधिहरुको बसाई लम्बिएको छ भने आफ्नो निर्धारित तालिकालाई नै प्रभावित पारेपछि केहीले असन्तुष्टि नै व्यक्त गरेका छन् ।
मंगलबार पटक पटक समय फेरिएको छ । अनि फेरिएको समयसमेत प्रभावित हुँदा चिन्ता थपिएको छ । त्यसै त अहिले काठमाडौँमा जाडो दिनानुदिन बढ्दै गएको छ त्यसमाथि मंगलबार रातभर मतदान हुने जानकारी पाएसँगै कतिपय महाधिवेशन प्रतिनिधिको निद्रा हराम हुने भएको छ ।
पार्टीको केन्द्रीय निर्वाचन आयोगले कार्यतालिका संशोधन गर्दै मंगलबार बेलुकी ७ बजेदेखि मात्र मतदान शुरू हुने जनाए पनि विद्युतीय प्रविधिबाट मतदान हुने भएकाले पटक पटक फेरिएका नामहरूका कारण मतदान शुरू हुन अझै समय लाग्ने राम–लक्ष्मणले जनाएका छन् ।
आयोगका सचिव डा कुन्साङ लामाले जारी गरेको सूचना अनुसार भने मतदान प्रक्रिया ७ बजे सुरु भई राति १ बजे सकिने छ । तर त्यो सम्भव नहुने लगभग स्पष्टै छ ।
निर्वाचन आयोगका अनुसार आन्तरिक प्राविधिक तयारी पूरा नहुँदा मतदान पछि धकेलिएको हो। विद्युतीय भोटिङ मेसिनमा उम्मेदवारहरूको नामावली इन्ट्री गर्ने क्रममा क्रमसंख्या तलमाथि परेको र त्यसलाई सच्याउन समय लागेकाले निर्धारित समयमा मतदान शुरू गर्न नसकिएको आयोगले जनाएको छ।
अध्यक्ष पदका लागि तेस्रो पटक अध्यक्ष बन्न केपी शर्मा ओली लागिपरेका छन् । त्यस्तै उनलाई ईश्वर पोखरेलले टक्कर दिएका छन् । ईश्वरको टिमले जित्यो भने सबै पदमा परिवर्तन हुने देखिन्छ भने ओलीले जित्दा उनीजस्तै गरी अन्य पदाधिकारीका पद दोहोरिने छन् ।
