काठमाडौँ। अन्तर्राष्ट्रिय व्यापार र भू–राजनीतिक तनावका कारण उत्पन्न हुने जोखिमले एकल मुद्रा क्षेत्र (यूरोजोन) को अर्थतन्त्र अर्को वर्ष अपेक्षा गरेभन्दा कम वृद्धि हुने युरोपेली सङ्घ (ईयू) का कार्यकारी प्रमुखले सोमबार प्रक्षेपण गरेका छन्।

युरोपेली आयोगले २० देशहरूको एकल मुद्रा क्षेत्र (यूरोजोन) सन् २०२६ मा १.२ प्रतिशतले बढ्ने अनुमान गरेको छ, जुन यसअघिको १.४ प्रतिशतको पूर्वानुमानबाट तल झरेको हो। युरोपेली सङ्घका प्रमुख वाल्डिस डोम्ब्रोभ्स्कीले अमेरिकी व्यापार नीति र चीनजस्ता आर्थिकरूपमा शक्तिसम्पन्न राष्ट्रहरूको प्रतिक्रियाले विश्वव्यापी व्यापारमा असर पार्ने अपेक्षा ईयूले गरेको बताए। उनले ब्रसेल्समा पत्रकारहरूसँग भने, "ईयूको अत्यधिक खुला अर्थतन्त्र जारी व्यापार प्रतिबन्ध र अनिश्चितताको लागि संवेदनशील छ।"

ईयूका कार्यकारी प्रमुखले युरोपेली सङ्घ लगायतका साझेदारहरूसँगको अमेरिकी व्यापार सम्झौताले 'केही अनिश्चितता कम गरेको' भए पनि आयोगका अनुसार अमेरिका (२.१%) र चीन (४.२%) को तुलनामा युरोप पछाडि रहेको छ। ईयूका सम्पूर्ण २७ सदस्य राष्ट्रमा सन् २०२६ मा १.४ प्रतिशतको वृद्धि हुने अपेक्षा गरिएको छ, जुन मे महिनाको १.५ प्रतिशतको तुलनामा थोरै कम हो। यद्यपि, डोम्ब्रोभ्स्कीले ईयूको अर्थव्यवस्थाले वर्षको पहिलो नौ महिनामा अपेक्षालाई पराजित गरेको भन्दै चुनौतीपूर्ण बाह्य वातावरणको बाबजुद वृद्धि मध्यम गतिमा जारी रहनेमा आशावादी देखिएका छन्।

प्रमुख अर्थतन्त्रको प्रक्षेपण:

जर्मनी: ईयूको सबैभन्दा ठूलो अर्थतन्त्र जर्मनीको वृद्धिदर यसवर्ष ०.२ प्रतिशत र आगामी वर्ष १.२ प्रतिशतले बढ्ने अपेक्षा गरिएको छ।

फ्रान्स: दोस्रो ठूलो युरोपेली अर्थतन्त्र फ्रान्सले यस वर्ष ०.७ प्रतिशत र सन् २०२६ मा ०.९ प्रतिशतको वृद्धि हुने अपेक्षा गरेको छ। घरेलु आर्थिक र नीतिगत अनिश्चितताले वृद्धिमा असर पार्ने आयोगको भनाइ छ।

एकल मुद्रा प्रयोग हुने युरोपेली क्षेत्रमा मुद्रास्फीति सन् २०२५ मा २.१ प्रतिशत पुग्ने अपेक्षा गरिएको छ, जुन युरोपेली केन्द्रीय बैंकको दुई प्रतिशतको लक्ष्यको नजिक छ। डोम्ब्रोभ्स्कीले स्थिर मूल्यमा निरन्तर फिर्ती युरोपेली उपभोक्ताहरूको लागि राम्रो समाचार भएको बताए। ब्रसेल्सले सन् २०२६ मा मुद्रास्फीति १.९ प्रतिशतमा खुम्चिने बताएको छ।