रामेछाप । रामेछाप र दोलखाको उत्तरी क्षेत्र शैलुङका किसानलाई अहिले भ्याइनभ्याई छ ।
अति उब्जाउयोग्य भूमि रहेको शैलुङमा अहिले बेसिजनको काउली, बन्दा, गाजर, मुला केराउलगायतका तरकारी बाली लोभलाग्दो छ । किसानका बारी, घर, पेटीदेखि सडकसम्म जताततै तरकारी नै तरकारी देखिन्छ ।
अहिले किसानले लगाएको सबै तरकारी बिक्रीको बेला भएको स्थानीय किसान दावासाङ्बु शेर्पाले बताए ।
तरकारीको सिजनमा शैलुङका एक जना किसानले चार/पाँच लाख रुपैयाँसम्मको तरकारी बेच्ने शेर्पाले जानकारी दिए ।
किसानले उत्पादन गरेको शैलुङको आलुलगायतका तरकारी किन्न व्यापारी किसानका बारीमा नै पुग्ने गर्दछन् ।
यस वर्ष असोजको वर्षाले सडक बिगारेको कारण भने किसानलाई आफ्नो उत्पादन बजार पुर्याउन निक्कै गाह्रो भएको शेर्पाले बताए ।
शैलुङको तरकारीको मुख्य बजार काठमाडौँको कालीमाटी हो । यसबाहेक अन्य स्थानीय बजारमा पनि तरकारी बिक्री हुने गर्दछ ।
काठमाडौँ जाने बीपी राजमार्ग बन्द हुँदा किसानलाई तरकारी काठमाडौँ पुर्याउन निक्कै समस्या भयो ।
मुढे-शैलुङ सडकमर्मत गरी केही तरकारी किसानले सो बाटो भएर काठमाडौँसम्म पुर्याए । अब बीपी राजमार्ग सञ्चालनमा आएकोले उत्पादन बजार पुर्यउन किसानलाई सहज हुने भएको छ ।
