काठमाडौँ । भदौ २३ गतेको राज्यबाट भएको जेन–जीमाथिको बर्बरतापछि २४ गते सरकारविरुद्ध जेन–जी आन्दोलन खनियो । तत्कालीन सत्ताधारी नेकपा एमाले र नेपाली कांग्रेसका नेताहरुका घर छानीछानी जलाइए । भेटिएसम्मका नेतालाई पनि छाडेनन् आन्दोलनकारीले ।
सोही क्रममा कांग्रेस र एमालेका पार्टी कार्यालय पनि तोडफोडसहित जलाइए । सबैभन्दा ठूलो क्षति कांग्रेस र एमालेलाई नै भयो । त्यसपछि माओवादी केन्द्रलाई । अन्य दललाई भने नगन्यमात्रामा क्षति भयो ।
शुक्रबार नेकपा एमालेका वरिष्ठ उपाध्यक्ष ईश्वर पोखरेलसहितको टोली कांग्रेस मुख्यालय सानेपामा पुगेर भग्नावशेष अवलोकन गरेको छ ।
सो क्रममा दुई दलका नेताहरुले आपसमा दुःख साटासाट गरेका थिए ।
एमालेले संविधान दिवस आफ्नो भग्नावशेष पार्टी मुख्यालयमा मनाएर कांग्रेस मुख्यालय पुगेको थियो । कांग्रेसले भने संविधान दिवस नमनाइ पार्टी केन्द्रीय कार्यसम्पादन समितिको बैठकमा होमिएको थियो ।
