एमालेले पार्टी मुख्यालयमा अध्यक्ष ओली बिना मनायो संविधान दिवस [फोटोफिचर]
संविधान दिवस एमालेलाई विशेष
हाम्रा कुरा
प्रकाशित २०८२ असोज ३ शुक्रबार
985
Shares
तस्बिर – नेपाल फोटो लाइब्रेरी ।
काठमाडौँ । नेकपा एमालेले पार्टी मुख्यालय च्यासलमा संविधान दिवस मनाएको छ । अध्यक्ष एवं निवर्तमान प्रधानमन्त्री केपी शर्मा ओलीको अनुपस्थितिमै पार्टीले संविधान दिवस मनाएको हो ।
ओलीको अनुपस्थितिमा उपाध्यष अष्टलक्ष्मी शाक्यले कार्यक्रमको अध्यक्षता गरेकी छिन् । ओली गत भदौ २४ गते प्रधानमन्त्रीको पदबाट राजीनामा दिएपछि सेनाले हेलिकोप्टरमा सुरक्षित स्थलमा लगेको थियो ।
स्थिति साम्य भएपछि उनी बिहीबारमात्रै भक्तपुरको गुन्डुमा डेरा सरेका थिए । उनको बालकोटको घर भने जेन–जी आन्दोलनमा जेन–जीहरुले जलाएका थिए ।
भदौ २३ गते ओली नेतृत्वको सरकारले जेन–जीमाथि अन्धानधुन्ध गोली प्रहार गरी सोही दिन १९ जनाको ज्यान लिएको थियो । त्यो कुनै पनि नेपालको राजनीतिक इतिहासको एकैदिनको सबैभन्दा ठूलो हत्या थियो ।
जेनजी आन्दोलनमा अहिलेसम्म ७२ जनाको ज्यान गइसकेको छ ।
सो घटनापछि सेनाले मुलुकको सुरक्षाव्यवस्था सम्हालेको थियो भने सेनाकै अग्रसरतामा जेन–जी समूहहरुसँग वार्ता भई उनीहरुले सामाजिक सञ्जाल डिस्कोर्डमा गरेको मतदानका आधारमा सुशीला कार्की अन्तरिम प्रधानमन्त्री भएकी छिन् ।
उनलाई आगामी फागुन २१ गते प्रतिनिधि सभाको चुनाव गर्ने म्यान्डेट रहेको छ ।
संविधान दिवस एमालेलाई विशेष
यसपालिको संविधान दिवस एमालेलाई विशेष रहेको छ । यसअघि खासै विशेष रौनक विशेष प्राथमिकता दिएर नमनाएको भए पनि यसपालि भने आफ्नै नेतृत्वमा सरकार रहेका बेलामा संविधानको उललंघन भएको विश्लेषणसहित एमालेले संविधान दिवस मनाएको हो ।
संविधानमा संसद विघटनको प्रावधान छैन । सोही बुँदालाई टेकेर एमालेले संसद विघटनको विरोध गरेको हो ।
यद्यपि केपी ओलीकै पालामा यसअघि दुई पटकसम्म संसद विघटनको सिफारिस हुँदा तत्कालीन राष्ट्रपति एवं एमालेकी पूर्व उपाध्यक्ष विद्यादेवी भण्डारीले विघटन सिफारिस स्वीकार गरी विघटन गरिदिएकी थिइन् ।
सर्वोच्च अदालतले संसद ब्युँताएको थियो ।
यसपालि एमालेले त्यही अदालतको नजिरलाई टेकिरहेको छ । तर विशेष परिस्थितिमा भएको परिवर्तनलाई एमालेको पहिलो पुस्ताले अझै आत्मसात् गरेको छैन ।
कार्यक्रममा ओली बाहेकका पदाधिकारीहरु उपस्थित भएर संविधान दिवस मनाएका छन् ।
मुलुकमा भएको दोस्रो संविधान सभाको निर्वाचनपछि गठित संविधानसभाले अथक मेहनत र लामो विवादपछि ‘नेपालको संविधान, २०७२’ जारी गरेको थियो ।
विसं २०७२ असोज ३ गते राति नयाँ बानेश्वरस्थित तत्कालीन संविधानसभा बैठकस्थल अन्तरराष्ट्रिय सम्मेलन केन्द्रबाट तत्कालीन राष्ट्रपति डा रामवरण यादवले यो संविधानलाई जारी भएको घोषणा गरेका थिए ।
