काठमाडौँ। चालू आर्थिक वर्षको पहिलो महिना (साउन) मा नेपालको व्यापार घाटा रु एक खर्ब १९ अर्ब ११ करोड पुगेको छ। नेपाल राष्ट्र बैंकले सोमबार सार्वजनिक गरेको विवरणअनुसार, कूल वस्तु व्यापार घाटामा २.५ प्रतिशतले वृद्धि भएको छ। गत वर्षको सोही अवधिमा यो घाटा ०.४ प्रतिशतले मात्र बढेको थियो।
आयात: साउन महिनामा कुल वस्तु आयात ११.४ प्रतिशतले बढेर रु एक खर्ब ४३ अर्ब चार करोड पुगेको छ। आयात बढ्नुमा भारतबाट ७.५ प्रतिशत, चीनबाट १४.१ प्रतिशत र अन्य मुलुकबाट २०.५ प्रतिशतको वृद्धि मुख्य कारण हो। यस अवधिमा भटमासको कच्चा तेल, यातायातका उपकरण, चामल/धान, कोइला र रासायनिक मलजस्ता वस्तुको आयात बढेको छ।
निर्यात: कुल वस्तु निर्यात भने ९५.७ प्रतिशतले बढेर रु २३ अर्ब ९३ करोड पुगेको छ। यो वृद्धि भारततर्फको निर्यातमा १५६.७ प्रतिशतको उच्च वृद्धिका कारण भएको हो। यद्यपि, चीन र अन्य मुलुकतर्फको निर्यात क्रमशः ६५.२ प्रतिशत र १.४ प्रतिशतले घटेको छ। यस अवधिमा भटमासको तेल, पाम तेल, पोलिस्टरको धागो, अलैँची, र जुटका सामानलगायतको निर्यातमा वृद्धि भएको छ।
समीक्षा अवधिमा निर्यात-आयात अनुपात १६.७ प्रतिशत पुगेको छ, जुन अघिल्लो वर्षको ९.५ प्रतिशतको तुलनामा उल्लेखनीय सुधार हो। यद्यपि, बढ्दो आयातका कारण मुलुकको व्यापार घाटा भने बढ्दो क्रममा रहेको छ।
